ବାଲେଶ୍ୱର ପରେ ଏବେ ବ୍ରାଉନସୁଗାରର ନୂଆ ହବ ଭଦ୍ରକ

ଭଦ୍ରକ (ବଡ଼ ଖବର ବ୍ୟୁରୋ): ଆଳୁ ଖୋଳୁଖୋଳୁ ବାହାରିଲେ ମହାଦେବ । ମାସ୍କ ଧରପଗଡ ବେଳେ ପୋଲିସ ପଞ୍ଝାରେ ପଡିଲେ ଧଳା ଜହର ବେପାରୀ । ଭଦ୍ରକ ୧୬ନଂ ଜାତୀୟ ରାଜପଥ ରାଣିତାଲ ନିକଟରେ ଭଦ୍ରକ ଗ୍ରାମାଞ୍ଚଳ ପୋଲିସ ପକ୍ଷରୁ ମାସ୍କ ଚେକିଂ ଚାଲିଥିଲା । ଏହି ସମୟରେ ଜଳେଶ୍ୱର ପଟୁ ଆସୁଥିବା ଏକ କାରକୁ ଅଟକାଇଥିଲା ପୋଲିସ । ପୋଲିସକୁ ଦେଖି ଡ୍ରାଇଭର ଦ୍ରୁତଗତିରେ ପଳାଇବା ପାଇଁ ଚେଷ୍ଟା କରିଥିଲା । ତେବେ ରାଣିତାଲ ନିକଟ ଲେବଲ କ୍ରସିଂରେ ଫାଟକ ବନ୍ଦ ଥିବାରୁ କାରଟି ଅଟକି ଯାଇଥିଲା । ପୋଲିସ ଏମାନଙ୍କ ପିଛା କରି କାରକୁ କାବୁ କରିବା ସମୟରେ ଜଣେ ବ୍ରାଉନସୁଗାର ନେଇ କାରରୁ ଚମ୍ପଟ ମାରିଥିଲା । କାରରେ ଥିବା ଅନ୍ୟ ତିନିଜଣକୁ କାବୁ କରିଥିଲା ପୋଲିସ । ସେମାନଙ୍କ ନିକଟରୁ ଦଶଗ୍ରାମ ବ୍ରାଉନସୁଗାର ସହ ଖଣ୍ଡା,କାତି ଓ ଖେଳନା ବନ୍ଧୁକ ଜବତ କରିଛି ପୋଲିସ ।

ବାଲେଶ୍ୱର ପରେ ଏବେ ବ୍ରାଉନସୁଗାରର ନୂଆ ହବ ପାଲଟିଛି ଭଦ୍ରକ । ପ୍ରତିଦିନ ଭଦ୍ରକରୁ ବିପୁଳ ବ୍ରାଉନସୁଗାର ଜବତ ହେଉଛି । ପୋଲିସ ପଞ୍ଝାକୁ ଆସୁଛନ୍ତି ବେପାରୀ । କିନ୍ତୁ ପରେ ବେଲ ପାଇ ପୁଣି ଆପଣାଉଛନ୍ତି ଏହି କାରବାର । ରାତାରାତି କୋଟିପତି ହେବା ନିଶାରେ ଏହି ନିଶା କାରବାର କରୁଛନ୍ତି ଯୁବଗୋଷ୍ଠୀ । ଏମାନଙ୍କୁ ରୋକିବା ଏବେ ଭଦ୍ରକ ପୋଲିସ ପାଇଁ ଚ୍ୟାଲେଞ୍ଜ ପାଲିଟିଛି ।