କଲିକତା (ବଡ଼ ଖବର) : ପଶ୍ଚିମବଙ୍ଗରେ ନେତାଜୀ ଜୟନ୍ତୀଙ୍କୁ ନେଇ ଜୋର ଧରିଛି ରାଜନୀତି । ମୁହାଁମୁହିଁ ହୋଇଛନ୍ତି କେନ୍ଦ୍ର ଓ ପଶ୍ଚିମବଙ୍ଗ ସରକାର । ନେତାଜୀ ଜୟନ୍ତୀକୁ ପରାକ୍ରମ ଦିବସ ଭାବେ ପାଳନ କରିଛନ୍ତି କେନ୍ଦ୍ର ସରକାର । ଆଜି ନେତାଜୀଙ୍କ ଜନ୍ମ ଜୟନ୍ତୀ ଅବସରରେ କୋଲକାତାର ଭିକ୍ଟୋରିଆ ମେମୋରିଆଲରେ ଆୟୋଜିତ ପରାକ୍ରମ ଦିବସ କାର୍ୟ୍ୟକ୍ରମରେ ସାମିଲ ହୋଇଛନ୍ତି ପ୍ରଧାନମନ୍ତ୍ରୀ । ଅନ୍ୟପଟେ ନେତାଜୀ ଜୟନ୍ତୀକୁ ପଶ୍ଚିମବଙ୍ଗରେ ଦେଶନାୟକ ଦିବସ ଭାବେ ପାଳନ କରିଛନ୍ତି ମମତା ବାନାର୍ଜୀଙ୍କ ସରକାର । ନେତାଜୀ ଜୟନ୍ତୀ ଅବସରରେ ମମତା ଏକ ବିଶାଳ ଶୋଭାଯାତ୍ରା କରିଛନ୍ତି ।
ଉତ୍ତର କୋଲକାତାରେ ଥିବା ଶ୍ୟାମ ବଜାରରୁ ମମତା ପଦଯାତ୍ରାରେ ବାହାରି ଦକ୍ଷିଣ କୋଲକାତାରେ ଥିବା ରେଡ୍ ରୋଡ ପର୍ଯ୍ୟନ୍ତ ଯାଇଛନ୍ତି । ୯ କିଲୋମିଟର ଧରି ଏହି ପଦଯାତ୍ରାର ନିଜେ ନେତୃତ୍ୱ ନେଇଛନ୍ତି ମମତା ବାନାର୍ଜୀ । ଅପରାହ୍ନ ସାଢେ ୩ଟାରେ ନ୍ୟାସନାଲ ଲାଇବ୍ରେରୀରେ ଅନ୍ତର୍ଜାତୀୟ ସେମିନାରକୁ ସମ୍ବୋଧନ କରିଛନ୍ତି ପ୍ରଧାନମନ୍ତ୍ରୀ । ନେତାଜୀଙ୍କ ସଂଗୃହିତ ଚିଠିକୁ ନେଇ ଏକ ପୁସ୍ତକର ଲୋକାର୍ପଣ କରିଛନ୍ତି ମୋଦି । ଆଇଏନଏର ସେନାନୀ ଏବଂ ସ୍ୱାଧୀନତା ସଂଗ୍ରାମୀଙ୍କୁ ସମ୍ମାନିତ କରାଯାଇଛି । ସେହିପରି ଭିକ୍ଟୋରିଆ ମେମୋରିଆଲରେ ନେତାଜୀଙ୍କ ସ୍ମୃତିରେ ତିଆରି କରାଯାଇଥିବା ମ୍ୟୁଜିୟମକୁ ଉଦଘାଟନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆଗକୁ ପଶ୍ଚିମବଙ୍ଗରେ ବିଧାନସଭା ନିର୍ବାଚନ ଥିବାରୁ ନେତାଜୀଙ୍କୁ ନେଇ ବିଜେପି ଓ ଟିଏମସି ମଧ୍ୟରେ ଜୋରଦାର ହେବ ରାଜନୀତି ।
