କୋଲକାତା (ବଡ଼ ଖବର ବ୍ୟୁରୋ): ପଶ୍ଚିମବଙ୍ଗରେ ଜାରି ରହିଛି ଦ୍ୱିତୀୟ ପର୍ଯ୍ୟାୟ ଭୋଟ ଗ୍ରହଣ । ଅନେକ ବୁଥରେ ହିଂସା ଲାଗିରହିଥିବା ଖବର ସାମ୍ନାକୁ ଆସିଛି । କିନ୍ତୁ ନନ୍ଦିଗ୍ରାମରେ ବିଜେପିର ଜଣେ କର୍ମୀ ଆତ୍ମହତ୍ୟା କରିଛନ୍ତି । ସେ ୨୮ ନମ୍ବର ବୁଥ ନିକଟରେ ଆତ୍ମହତ୍ୟା କରିଛନ୍ତି । ଆତ୍ମହତ୍ୟା କରିଥିବା କର୍ମୀ ହେଲେ ଉଦୟ ଶଙ୍କର । ଝୁଲନ୍ତା ଅବସ୍ଥାରେ ତାଙ୍କର ମୃତ ଦେହ ଉଦ୍ଧାର କରାଯାଇଛି ।
ଟିଏମସି କର୍ମୀଙ୍କ ଆତଙ୍କ ଓ ନେତାଙ୍କ ଧମକ ଯୋଗୁ ଉଦୟ ଆତ୍ମହତ୍ୟା କରିଛନ୍ତି ବୋଲି ବିଜେପି ଅଭିଯୋଗ କରିଛି । ପୋଲିସ ଏହି ମାମଲାର ତଦନ୍ତ କରୁଛି । ତେବେ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ । ଦ୍ୱିତୀୟ ପର୍ଯ୍ୟାୟ ନିର୍ବାଚନ ଆରମ୍ଭ ହେବା ସମୟରୁ ନନ୍ଦିଗ୍ରାମରୁ ବିଭିନ୍ନ ହିଂସାକାଣ୍ଡର ଖବର ସାମ୍ନାକୁ ଆସୁଛି । ଦଳୀୟକର୍ମୀଙ୍କୁ ଗୃହବନ୍ଦୀ କରାଯାଇଥିବା ଟିଏମସି ଅଭିଯୋଗ କରିଛି ।
