ଗଜପତି(ବଡ଼ ଖବର ବ୍ୟୁରୋ): ଗଜପତି ଜିଲ୍ଲା ଗୋସାଣି ବ୍ଲକ କେରାଣ୍ଡି ପଞ୍ଚାୟତର ଡାଲିମ୍ବପୁର, ଅମରା ଓ ରାଟିଣି, ଯିବା ମୁଖ୍ୟରାସ୍ତାକୁ ଯାତାୟତ ପାଇଁ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ବ୍ରିଜ ନିର୍ମାଣ କାର୍ଯ୍ୟ ଚାଲିଥିଲା ।ହେଲେ ଗତ ୩ଦିନ ଧରି ଗଜପତି ଜିଲ୍ଲାରେ ଲାଗିରହିଥିବା ଲଗାଣ ବର୍ଷା ଯୋଗୁଁ ଅସ୍ଥାୟୀ ରାସ୍ତାଟି ସମ୍ପୂର୍ଣ୍ଣ ରୂପେ ଧୋଇ ହୋଇଯାଇଛି । ଯାହାଦ୍ୱାରା ଅମରା,ଡାଲିମ୍ବପୁର, ରାଟିଣି ୩ଖଣ୍ଡ ଗାଁର ଯାତାୟାତ ସମ୍ପୂର୍ଣ୍ଣ ରୂପେ ବନ୍ଦ ହୋଇଯାଇଛି । କୌଣସି ଜରୁରୀକାଳୀନ ପରିସ୍ଥିତିରେ ପାରଳାଖେମୁଣ୍ଡି ସହ ଯୋଗାଯୋଗ କରିବା ପାଇଁ ମଧ୍ୟ ଲୋକଙ୍କ ପକ୍ଷରେମୁସ୍କିଲ ହୋଇପଡିଛି ।
ବର୍ତ୍ତମାନ ଯାଏଁ ପ୍ରଶାସନ ପକ୍ଷରୁ କୌଣସି ଅଧିକାରୀ ଘଟଣା ସ୍ଥଳେ ପହଞ୍ଚି ନାହାନ୍ତି । ଲୋକମାନେ ନିଜର ଜୀବନ ଜୀବିକା ଠାରୁ ଆରମ୍ଭକରି ଦୈନନ୍ଦିନ ସମସ୍ତ କାମ ପାଇଁ ନିର୍ଭର କରୁଥିଲେ ଏହି ରାସ୍ତା ଉପରେ । ତେବେ ବର୍ତ୍ତମାନ ପାରଳାଖେମୁଣ୍ଡି ସହ ଯୋଗାଯୋଗ କରିବାକୁ ହେଲେ ଆନ୍ଧ୍ର ପଟରୁ ୧୪କିଲୋମିଟର ବୁଲି ଆସିଲା ପରେ ଯାଇ ପାରଳାଖେମୁଣ୍ଡି ରେ ସେମାନେ ପହଞ୍ଚି ପାରିବେ । ଯାହାକୁ ନେଇ ବର୍ତ୍ତମାନ ସ୍ଥାନୀୟ ଲୋକେ ଚିନ୍ତାରେ ପଡ଼ିଯାଇଛନ୍ତି । ତେବେଯଥାଶୀଘ୍ର ରାସ୍ତା ନିର୍ମାଣ କାର୍ଯ୍ୟ ଆରମ୍ଭ କରିବା ପାଇଁ ଲୋକେ ଦାବି କରିଛନ୍ତି।
