ମାତ୍ର ଛଅ ମାସରେ ବଦଳିଲେ ବିଜେପିର ୪ ମୁଖ୍ୟମନ୍ତ୍ରୀ
ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ସମଗ୍ର ଦେଶର ନଜର ବର୍ତ୍ତମାନ ଗୁଜୁରାଟ ରାଜନୀତି ଉପରେ ରହିଛି । ଗତ କାଲି ଗୁଜୁରାଟ ମୁଖ୍ୟମନ୍ତ୍ରୀ ବିଜୟ ରୂପାନି ହଠାତ ଇସ୍ତଫା ଦେଇ ସାରା ଦେଶକୁ ଚକିତ କରିଦେଇଥିଲେ । ଆଗକୁ ବିଧାନସଭା ନିର୍ବାଚନ ଥିବାବେଳେ ବିଜେପିର ଏପରି ଆଭିମୁଖ୍ୟ ଦେଶର ରାଜନୈତିକ ମାହୋଲକୁ ବେଶ ସରଗରମ କରିଦେଇଛି । ଅପରପକ୍ଷରେ ବିଜେପି ମୁଖ୍ୟମନ୍ତ୍ରୀଙ୍କ ଇସ୍ତଫା ଦେବା କିଛି ନୂଆ କଥା ନୁହଁ । ଗତ ଛଅ ମାସ ମଧ୍ୟରେ ବିଜେପିର ୪ ମୁଖ୍ୟମନ୍ତ୍ରୀ ଇସ୍ତଫା ଦେଇଛନ୍ତି । ତେବେ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ତିରଥ ସିଂହ ରାୱତ ଏବଂ ୪ ମାସ ପରେ ତାଙ୍କ ସ୍ଥାନରେ ମୁଖ୍ୟମନ୍ତ୍ରୀ ହୋଇଥିବା ତିବେନ୍ଦ୍ର ରାୱତ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ ।
ସେହିପରି କର୍ଣ୍ଣାଟକ ମୁଖ୍ୟମନ୍ତ୍ରୀ ବି ଏସ ୟେଦୁରାପ୍ପା ମଧ୍ୟ ଦୁଇମାସ ତଳେ ତାଙ୍କ ପଦରୁ ଇସ୍ତଫା ଦେଇଛନ୍ତି । ଅପରପକ୍ଷରେ ଆସନ୍ତା ବର୍ଷ ଗୁଜରାଟରେ ହେବାକୁ ଥିବା ବିଧାନସଭା ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀଙ୍କ ଇସ୍ତଫା ଦେବା କଥାକୁ ସହଜରେ ହଜମ କରିପାରୁ ନାହାଁନ୍ତି ବିରୋଧୀ ଦଳ । ରୂପାନି ନିଜର ଇସ୍ତଫା ପତ୍ର ରାଜ୍ୟପାଳଙ୍କୁ ଦେଇଥିବାର ସୂଚନା ମିଳିଛି । ଏହା ସହ ଦଳ ତାଙ୍କୁ ଯେଉଁ ଦାୟିତ୍ୱ ଦେବ ସେ ତାକୁ ପାଳନ କରିବେ ବୋଲି ଗଣମାଧ୍ୟମ ନିକଟରେ ସ୍ପଷ୍ଟ କରିଛନ୍ତି । ଅନ୍ୟପଟେ ଗୁଜୁରାଟ ବିଧାନସଭା ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀଙ୍କ ଇସ୍ତଫା ଦେବା ଘଟଣା ମଧ୍ୟ ପୁରୁଣା । ତେବେ ୨୦୧୬ ମସିହାରେ ବିଧାନସଭା ନିର୍ବାଚନର ବର୍ଷକ ପୂର୍ବରୁ ତତ୍କାଳୀନ ମୁଖ୍ୟମନ୍ତ୍ରୀ ଆନନ୍ଦି ବେନ ପଟେଲ ତାଙ୍କ ପଦରୁ ଇସ୍ତଫା ଦେଇଥିଲେ । ଏହା ପରେ ରୂପାନି ମୁଖ୍ୟମନ୍ତ୍ରୀ ହୋଇଥିଲେ ।
ନିର୍ବାଚନ ପୂର୍ବରୁ ଗୁଜରାଟରେ ବିଜେପିର ଭାବମୂର୍ତ୍ତୀ ସୁଧାରିବାକୁ ବିଜେପି ମୁଖ୍ୟମନ୍ତ୍ରୀ ରୂପାନି ଇସ୍ତଫା ଦେଇଥିବାର ଅନୁମାନ କରାଯାଉଛି । ବିଜେପି ରାଷ୍ଟ୍ରୀୟ ସାଧାରଣ ସମ୍ପାଦକ ବି ଏଲ ସନ୍ତୋଷ, ଦୁଇ କେନ୍ଦ୍ରମନ୍ତ୍ରୀ ମନସୁଖ ମାଣ୍ଡଭିୟ ଓ ପୁରୁଷୋତ୍ତମ ରୂପାଲାଙ୍କ ସହିତ ରାଜ୍ୟ ପ୍ରଭାରୀ ଭୂପେନ୍ଦ୍ର ଯାଦବ ଏକ ମିଳିତ ବୈଠକରେ ମୁଖ୍ୟମନ୍ତ୍ରୀ ବିଜୟ ରୂପାନିଙ୍କୁ ଭେଟି ତାଙ୍କୁ କେନ୍ଦ୍ରୀୟ ନେତୃତ୍ୱର ନିଷ୍ପତ୍ତି ସମ୍ପର୍କରେ ଅବଗତ କରାଇଥିଲେ । ଏହା ପରେ ରୂପାନି ନିଜ ପଦରୁ ଇସ୍ତଫାର ଦେଇଥିବାର ସୂଚନା ମିଳିଛି ।