ଦୁର୍ବୃତ୍ତଙ୍କୁ କାବୁ କଲା ପୋଲିସ, କୋଟିଏ ପାଞ୍ଚ ଲକ୍ଷ ଟଙ୍କା ଉଦ୍ଧାର
ଆଠଗଡ(ବଡ଼ ଖବର ବ୍ୟୁରୋ): ଏଟିଏମ କ୍ୟାସ ଭ୍ୟାନରୁ ଟଙ୍କା ଲୁଟି ଫେରାର ହେଉଥିବା ବେଳେ ୩ ଦୁର୍ବୃତ୍ତ ଧରା ପଡିଛନ୍ତି । ଢେଙ୍କାନାଳ ଜିଲ୍ଲା ସଦାଶିବପୁର ଭୋଜଦେଇପୁର ଗାଁରୁ ଧରିଲା ପୋଲିସ । ଦୁର୍ବୃତ୍ତଙ୍କ ଠାରୁ ପୋଲିସ ୪ଟି ପିସ୍ତଲ ଓ କୋଟିଏ ଟଙ୍କା ଡବତ କରିଛି । ଅନ୍ୟ ଜଣେ ଫେରାର ହୋଇଯାଇଥିବା ସୂଚନା । ତେବେ ଆଜି ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ ଏଟିଏମରେ ଟଙ୍କା ଲୋଡ କରିବା ପାଇଁ ଏକ କ୍ୟାସ ଭ୍ୟାନ ଯାଇଥିଲା । ଅପରାହ୍ନ ପ୍ରାୟ ଗୋଟାଏ ବେଳେ ସେମାନେ ଟଙ୍କା ଭ୍ୟାନ ଧରି ଆଠଗଡରୁ ତିଗିରିଆ ଯାଉଥିଲେ ।
ତେବେ ହଠାତ ଏତିକି ବେଳେ ୫ରୁ ୬ ଜଣ ଦୁର୍ବୃତ୍ତ ମୁଖା ପିନ୍ଧି ଆସି ସେମାନଙ୍କ ଉପରକୁ ମାରଣାସ୍ତ୍ର ଦେଖାଇ ଆକ୍ରମଣ କରିଥିଲେ । ପରେ କ୍ୟାସ ଭ୍ୟାନକୁ ଧରି ଘଟଣାସ୍ଥଳରୁ ଫେରାର ହୋଇଯାଇଥିଲେ । ଖବର ପାଇ ଆଠଗଡ ପୋଲିସ ଆଖପାଖ ଅଞ୍ଚଳରେ ଥାନାକୁ ଏ ନେଇ ଖବର ଦେଇଥିଲା । ସେହି ଖବରକୁ ଆଧାର କରି ଢେଙ୍କାନାଳ ପୋଲିସ ତତ୍ପର ହୋଇଥିଲା । ଦୁର୍ବୃତ୍ତଙ୍କୁ ଧରିବା ଲାଗି ବିଭିନ୍ନ ସ୍ଥାନରେ ଚଢାଉ ପାଇଁ ଉଦ୍ୟମ କରୁଥିଲା । ଏତିକି ବେଳେ ଏକ କାର ଦୃତ ଗତିରେ ପଳାଉଥିବା ଖବର ପାଇଥିଲା ପୋଲିସ । ତେବେ ପୋଲିସ ସେହି କାରକୁ ପିଛା କରିଥିଲା ।
ପାଖାପଖି ୩୦ରୁ ୪୦ ମିନିଟ୍ ପିଛା କରିବା ପରେ ଦୁର୍ବୃତ୍ତମାନେ କାରଟିକୁ ବ୍ରାହ୍ମଣୀ ନଦୀ କୂଳରେ ଛାଡି ଟଙ୍କା ଧରି ପଳାଇବାକୁ ଚେଷ୍ଟା କରିଥିଲେ । ତେବେ ସ୍ଥାନୀୟ ଲୋକ ଓ ପୋଲିସ ମିଳିତ ଭାବେ ୩ ଦୁବୃତ୍ତଙ୍କୁ କାବୁ କରିନେଇଥିଲେ । ସେମାନଙ୍କୁ ଧରିବା ସହ ପୋଲିସ କୋଟିଏ ଟଙ୍କା ଜବତ କରିଛି । ଏହି ଘଟଣାରେ ସମ୍ପୃକ୍ତ ଥିବା ୪ର୍ଥ ଅଭିଯୁକ୍ତ ଘଟଣାସ୍ଥଳରୁ ଫେରାର ହୋଇଯାଇଛି । ପୋଲିସ ନିଖୋଜ ଥିବା ଅଭିଯୁକ୍ତକୁ ଖୋଜିବା ପାଇଁ ଉଦ୍ୟମ ଜାରି ରଖିଛି ।