୨୦୨୪ ପାଇଁ ଅଣ୍ଟା ଭିଡ଼ୁଛି କଂଗ୍ରେସ, ୧୯ ବିରୋଧୀ ଦଳ ନେତାଙ୍କ ସହ ସୋନିଆଙ୍କ ଆଲୋଚନା

ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ୨୦୨୪ ପାଇଁ ଏବେଠୁ ଅଣ୍ଟା ଭିଡ଼ିବା ଆରମ୍ଭ କରିଦେଇଛି କଂଗ୍ରେସ । ବିରୋଧୀ ମାନଙ୍କୁ ବିଜେପି ବିରୋଧରେ ଏକଜୁଟ ହେବାକୁ ଆହ୍ୱାନ ଦେଇଛନ୍ତି କଂଗ୍ରେସ ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧୀ । ତେବେ ୨୦୧୯ରେ ମଧ୍ୟ କଂଗ୍ରେସ ସମସ୍ତ ବିରୋଧୀ ଦଳକୁ ଏକଜୁଟ କରିବାକୁ ଚେଷ୍ଟା କରିଥିଲା । ଏକ ମଞ୍ଚରେ ହାତ ଧରାଧରି ହୋଇ ଛିଡ଼ା ହୋଇଥିବା ନଜର ଆସିଥିଲେ ବିଭିନ୍ନ ବିରୋଧୀ ଦଳ । କିନ୍ତୁ ପରେ ଏହି ମହାମେଣ୍ଟ ଫେଲ ମାରିଥିଲା ।

କିନ୍ତୁ ୨୦୨୪ ନିର୍ବାଚନରେ ପୁଣି ଥରେ ଆଉ ରିସ୍କ ନେବାକୁ ଚାହୁଁନି କଂଗ୍ରେସ ଦଳ । ସେଥିପାଇଁ ଆଗୁଆ ଆରମ୍ଭ କରିଦେଇଛି ପ୍ରସ୍ତୁତି । ୧୯ଟି ବିରୋଧୀ ଦଳ ନେତାଙ୍କ ସହ ଏକ ଭର୍ଚୁଆଲ ଆଲୋଚନା କରିଛନ୍ତି ସୋନିଆ ଗାନ୍ଧୀ । ଯେଉଁଥିରେ ବିଜେପି ବିରୋଧରେ ଏକାଠି ହେବାକୁ ଆହ୍ୱାନ ଦେଇଛନ୍ତି ସୋନିଆ । ଏହାଛଡ଼ା ସେ ଆହୁରି ମଧ୍ୟ କହିଛନ୍ତି ରାଜନୈତିକ ଦଳ ମାନଙ୍କ ମଧ୍ୟରେ ବିଜାର ଗତ, ମତଭେଦ ପାର୍ଥକ୍ୟ ରହିବା ସ୍ୱାଭାବିକ । କିନ୍ତୁ ଏସବୁରୁ ଉପରକୁ ଯାଇ ଆମକୁ ଏକାଠି ହୋଇ କାମ କରିବାକୁ ପଡ଼ିବ । ବିରୋଧୀ ମାନଙ୍କୁ ଗୋଟିଏ ଲକ୍ଷ୍ୟ ନେଇ କାମ କରିବାକୁ ପଡ଼ିବ । ଏହାଛଡ଼ା ଅନ୍ୟ କୌଣସି ବିକଳ୍ପ ନାହିଁ ।

ତେବେ ବିରୋଧୀ ମାନଙ୍କ ନେତୃତ୍ୱ ନେବାରେ ମଧ୍ୟ କଂଗ୍ରେସର କୌଣସି ଆଗ୍ରହ ନାହିଁ । ନିକଟରେ ବିଜେପି ବିରୋଧୀ ଏକତା ମଞ୍ଚ ଏହା ପ୍ରମାଣ କରିଦେଇଛି । ବିରୋଧୀଙ୍କ ନେତୃତ୍ୱ କିଏ ନେବ ଏହି ଆଲୋଚନାରୁ ମଧ୍ୟ ଦୂରେଇ ରହିବାକୁ ଚାହେଁ କଂଗ୍ରେସ । ରାଜୀବ ଗାନ୍ଧୀଙ୍କ ୭୭ତମ ଜୟନ୍ତୀ ପାଳନ ଅବସରରେ ବିରୋଧୀ ନେତାଙ୍କ ସହ ଏକ ଭର୍ଚୁଆଲ ଆଲୋଚନା କରି ୨୦୨୪ ପାଇଁ ଏକଜୁଟ ହେବାକୁ ବାର୍ତ୍ତା ଦେଇଛନ୍ତି ସୋନିଆ ଗାନ୍ଧୀ ।