କଳାହାଣ୍ଡି (ବଡ଼ ଖବର ବ୍ୟୁରୋ): ଖୁସିରେ ଆତ୍ମବିଭୋର ଦାନ ମାଝୀ । କାହିଁକି ବା ନହେବେ । ଝିଅ ଯେତେବେଳେ ମାଟ୍ରିକ୍ ପାସ୍ କରିଛି। ଗାଁ ଏବଂ ପରିବାର ପାଇଁ ଗୌରବ ଅର୍ଜନ କରିଛି । କଳାହାଣ୍ଡି ଜିଲ୍ଲା ଥୁଆମୂଳ-ରାମପୁର ବ୍ଲକ ମେଲଘରାର ଦାନ ମାଝୀଙ୍କ ବଡ଼ ଝିଅ ଚାନ୍ଦିନୀ । ଚଳିତ ବର୍ଷ ୨୮୦ ମାର୍କ ରଖି ପାସ୍ କରିଛନ୍ତି ମାଟ୍ରିକ୍ । ଯାହା କି ଗାଁରେ ପ୍ରଥମ । କାରଣ ଆଜି ଯାଏଁ ମେଲଘରାର କୌଣସି ଝିଅ ମାଟ୍ରିକ୍ ପାସ୍ କରିନଥିଲେ । ତେଣୁ ଗର୍ବରେ ଦାନ କହୁଛନ୍ତି ଝିଅ ଜନ୍ମ କରି ବେଶ୍ ଖୁସି ।
ଚାନ୍ଦିନୀ ବି ଭାବପ୍ରବଣ ହୋଇଛନ୍ତି ପରୀକ୍ଷା ଫଳକୁ ନେଇ । କାରଣ ପାହାଡ଼ ଘେରା ଗାଁରେ ରହି ମାଟ୍ରିକ ପାସ୍ କରିବେ ବୋଲି ସେ ଆଶା କରିନଥିଲେ । ଏ ହେଉଛି ସେହି ଚାନ୍ଦିନୀ, ୨୦୧୬ରେ ଯିଏ ସରକାରୀ ବ୍ୟବସ୍ଥାର ଦେଖିଥିଲା ନଗ୍ନ ରୂପ । ବାପାଙ୍କ କାନ୍ଧରେ ଓହଳିଥିବା ମାର ଶବ କଡ଼େ କଡ଼େ ଏମିତି ବାଟ ଚାଲିଥିଲା ବାପା ସହ । ହାତରେ ଖଣ୍ଡେ ବ୍ୟାଗ୍ ଧରି ଲୁହ ଝରାଉଥିଲା।
