ବନ୍ଦ ଘରୁ ମୃତଦେହ ଉଦ୍ଧାର

ଭୁବନେଶ୍ୱର, (ବଡ଼ ଖବର ବ୍ୟୁରୋ): ରାଜଧାନୀରୁ ପୁଣି ମୃତଦେହ ଉଦ୍ଧାର। ଘାଟିକିଆ ଅଞ୍ଚଳରେ ଏକ ତାଲା ପଡ଼ିଥିବା ଘର ଭିତରୁ ପୋଲିସ ଆଜି ଜଣେ ପ୍ରଫେସରଙ୍କ ମୃତଦେହ ଉଦ୍ଧାର କରିଛି। ମୃତକ ହେଉଛନ୍ତି ଭାଗବତ ପ୍ରସାଦ ରଥ ଏବଂ ସେ କୋରାପୁଟ ଜିଲ୍ଲାର ସୁନାବେଢ଼ା ବାସିନ୍ଦା। ଘାଟିକିଆରେ ଏକ ଭଡ଼ା ଘରେ ରହୁଥିଲେ। ଭୁବନେଶ୍ୱରର ଏକ ଘରୋଇ ଇଞ୍ଜିନିୟରିଂ କଲେଜରେ ପ୍ରଫେସର ଭାବରେ କାର୍ୟ୍ୟ କରୁଥିଲେ। ଗତ ଚାରିଦିନ ହେବ ତାଙ୍କ ଘର ଭିତରୁ ବନ୍ଦ ଥିଲା। ଘରୁ ଦୁର୍ଗନ୍ଧ ବାହାରିବାରୁ ପଡ଼ୋଶୀ ପୋଲିସକୁ ଜଣାଇଥିଲେ। ସେ କିଛିଦିନ ଧରି ନିଜ ଅନଲାଇନ୍ କ୍ଲାସ୍ ମଧ୍ୟ କରି ନ ଥିଲେ। ରଥଙ୍କ ପରିବାର ଭୁବନେଶ୍ୱରରେ ପହଞ୍ଚିବା ପରେ ତାଙ୍କ ମୃତଦେହ ବ୍ୟବଚ୍ଛେଦ ପାଇଁ ପଠାଯାଇଥିଲା। ମୃତ୍ୟୁର କାରଣ ଖୋଜିବା ପାଇଁ ପୋଲିସ ତଦନ୍ତ ଆରମ୍ଭ କରିଛି। ପ୍ରାଥମିକ ସୂଚନାରୁ ରଥ ଆତ୍ମହତ୍ୟା କରିଥିବା ପୋଲିସ ସନ୍ଦେହ କରୁଛି।