ତିନିଦିନ ପରେ ନିଖୋଜ ଯୁବକଙ୍କ ଗଳିତଶବ ଉଦ୍ଧାର
ବାଲିଗୁଡା, (ବଡ଼ ଖବର ବ୍ୟୁରୋ): କନ୍ଧମାଳ ଜ଼ିଲ୍ଲା ସାରଙ୍ଗଗଡ଼ରେ ଚାଞ୍ଚଲ୍ୟ । ଗତ ୧୪ ତାରିଖରୁ ନିଖୋଜ ଯୁବକଙ୍କ ଗଳିତଶବକୁ ପୋଲିସ ଅଗ୍ନିଶମ ବାହିନୀ ସହାୟତାରେ କଲୋନୀ ସାହିର ଏକ ପରିତ୍ୟକ୍ତ କୂଅରୁ ଉଦ୍ଧାର କରିଛି । ଶବ ଉଦ୍ଧାର କରି ପୋଲିସ ଏହାର ତଦନ୍ତ ଚଳାଇଛି । ଘଟଣା ସ୍ଥଳରେ ଉଦୟଗିରି ଏସଡ଼ିପିଓ ଡ଼ି କେ ଆର ପଟ୍ଟନାୟକ ଉପସ୍ଥିତ ରହି ଘଟଣାର ତଦନ୍ତ ଚଳାଇଛନ୍ତି । ମୃତକ ଜଣକ ହେଲେ ବାହାଡାପଦାର ୨୧ ବର୍ଷୀୟ କଲେଜ ଛାତ୍ର ଶରଣପଞ୍ଜର ନାୟକ ବୋଲି ଜଣାପଡିଛି ।
ଗତ ୧୪ ତାରିଖ ଦିନ ଶରଣପଞ୍ଜରଙ୍କ ଜେଜେ ମାଆଙ୍କ ମୃତ୍ୟୁ ହୋଇଥିଲା । ଜେଜେମାଙ୍କ ଶବଦାହ କରିବାକୁ ଯାଇ ଆଉ ସେ ଘରକୁ ଫେରିନ ଥିଲେ ପରିବାର ଲୋକେ ବହୁ ଖୋଜାଖୋଜି ପରେ ସନ୍ଧାନ ନ ମିଳିବାରୁ ଏନେଇ ପରିବାର ଲୋକେ ଥାନାରେ ଏତଲା ଦେଇଥିଲେ । ଶୁକ୍ରବାର ସନ୍ଧ୍ୟାରେ ପରିବାର ଲୋକେ କୂଅରେ ଶବ ଭାସୁଥିବାର ଦେଖି ପୋଲିସକୁ ଖବର ଦେଇଥିଲେ । କଲୋନୀ ସାହିର ହରି ଶଙ୍କର ପାତ୍ରଙ୍କ ନାମରେ ହତ୍ୟା ଅଭିଯୋଗ ଆଣିଛନ୍ତି ପରିବାର ଲୋକେ । ପୋଲିସ ପ୍ରାଥମିକ ତଦନ୍ତରେ ଅନେକ ସୁରାକ ପାଇଥିବା ସୂଚନା ମିଳିଛି । ଏହି ହତ୍ୟାକାଣ୍ଡ ପ୍ରେମ ଜନିତବୋଲି ସାଧାରଣରେ ଅନୁମାନ କରାଯାଉଛି । କେଉଁଥି ପାଇଁ ଏହି ଘଟଣା ଘଟିଛି ତାହା ଶବ ବ୍ୟବଚ୍ଛେଦ ରିପୋର୍ଟ ଆସିଲା ପରେ ଏବଂ ପୋଲିସର ଅଧିକ ତଦନ୍ତ ପରେ ସବୁକିଛି ସ୍ପଷ୍ଟହେବ ।