ସୋନପୁର (ବଡ଼ ଖବର ବ୍ୟୁରୋ): ଡାକ୍ତର କଲେନି ମୃତ ଘୋଷଣା । ମୃତ ଶିଶୁକୁ ଧରି ଜିଲ୍ଲାପାଳଙ୍କ ଦ୍ୱାରସ୍ଥ ହେଲେ ପରିବାରଲୋକେ । ଏଭଳି ଦୃଶ୍ୟ ଦେଖିବାକୁ ମିଳିଛି ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ବ୍ଲକ କପାସିରା ଗାଁରେ । ସମ୍ରାଟ ପ୍ରଧାନ ତାଙ୍କର ଏକ ମାସର ଶିଶୁର ଦେହ ଖରାପ ହେବାରୁ ସୋନପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ । ଶିଶୁର ସ୍ୱାସ୍ଥ୍ୟାବସ୍ଥା ଗୁରୁତର ହେବାରୁ ଡାକ୍ତର ବୁର୍ଲ୍ଲା ଡାକ୍ତରଖାନାକୁ ରେଫର କରିଥିଲେ । ସଙ୍ଗେ ସଙ୍ଗେ ସମ୍ରାଟ ନିଜ ଶିଶୁକୁ ୧୦୮ ଯୋଗେ ବୁର୍ଲା ଡାକ୍ତରଖାନାକୁ ନେଉଥିଲେ । ବାଟରେ ଉଲୁଣ୍ଡା ନିକଟରେ ଶିଶୁଟିର ମୃତ୍ୟୁ ହୋଇଯାଇଥିଲା ।
ଶିଶୁଟିକୁ ବାପାମାଆ ଉଲୁଣ୍ଡା ଚିକିତ୍ସାଳୟକୁ ନେଇ ଡାକ୍ତରଙ୍କୁ ଦେଖାଇ ମୃତ୍ୟୁ ଘୋଷଣା କରିବା ପାଇଁ କହିଥିଲେ । ହେଲେ ସେଠାରେ ଡାକ୍ତରମାନେ ମୃତ୍ୟୁ ଘୋଷଣା କରିବା ପାଇଁ ମନା କରିଦେଇଥିଲେ । ସେଠାରୁ ପୁଣି ସମ୍ରାଟ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ ସେଠାରେ ମଧ୍ୟ ଡାକ୍ତାରମାନେ ମୃତ ଘୋଷଣା କରିବା ପାଇଁ ମନା କରିଦେଇଥିଲେ । ଶେଷରେ ବାଧ୍ୟ ହୋଇ ମୃତ ଶିଶୁକୁ ଧରି ସମ୍ରାଟ ଓ ତାଙ୍କ ପତ୍ନୀ କୁନି ଜିଲ୍ଲାପାଳଙ୍କ କାର୍ଯ୍ୟାଳୟକୁ ଆସି ଜିଲ୍ଲାପାଳଙ୍କୁ ଗୁହାରୀ କରିଥିଲେ । ଜିଲ୍ଲାପାଳଙ୍କ ହସ୍ତକ୍ଷେପ ପରେ ଡାକ୍ତରମାନେ ଶିଶୁଟିକୁ ମୃତ ଘଷୋଣା କରିଥିବା ପରିବାରଲୋକେ କହିଛନ୍ତି ।
