ଚାଷୀଙ୍କୁ ଘାରିଛି ମରୁଡ଼ି ଚିନ୍ତା

ସୁକିନ୍ଦା (ବଡ଼ ଖବର ବ୍ୟୁରୋ): ଚାଷୀଙ୍କୁ ଘାରିଛି ମରୁଡ଼ି ଚିନ୍ତା । ବର୍ଷା ଅଭାବରୁ ବିଲରେ ପଡିଥିବା ଧାନ ତଳି ଏବେ ପାଚି ଶୁଖିଲା । ଯାଜପୁର ଜିଲ୍ଲା ସୁକିନ୍ଦା ବିକାଶର ଗନ୍ତଶାଳା ଖଣି ଅଞ୍ଚଳରେ ଜମି ପଡ଼ିଆ ପଡିଥିବାରୁ ଚାଷୀ ଏବେ ଚିନ୍ତାରେ । ଚାଷ ଉପରେ ନିର୍ଭର କରୁଥିବା ଧାନ ଚାଷୀ ଏବେ ହତାଶ ।

ମୈାସୁମୀ ବର୍ଷାର ନାଁ ଗନ୍ଧ ନଥିବା ବେଳେ ପ୍ରଶାସନ ପକ୍ଷରୁ ସ୍ଵାଧିନତାର ୭୫ ବର୍ଷ ପରେ ମଧ୍ୟ କେନାଲ ମାଧ୍ୟମରେ ପାଣି ଯୋଗାଇଦେବାରେ ବିଫଳ । ସେପଟେ ଉଠା ଜଳସେଚନର ସୁବିଧା ମଧ୍ୟ ନାହିଁ । ରାଜ୍ୟସରକାର ଚାଷୀଙ୍କ ପାଇଁ କରିଥିବା ଯୋଜନା କେବଳ ଯୋଜନା ହିଁ ରହିଯାଇଛି । ରେଙ୍ଗାଲି ଡ୍ୟାମରେ ଜଳ ଆସୁଥିଲେ ମଧ୍ୟ ତାହା ଏଠିକାର ଚାଷୀଙ୍କ ପାଖରେ ପହଞ୍ଚି ପାରୁନି । ଏ ଅଞ୍ଚଳକୁ ରେଙ୍ଗାଲି ପାଣି ପହଞ୍ଚିବା ଅସମ୍ଭବ । ତେବେ ଏଠାରେ ତୁରନ୍ତ ଉଠା ଜଳସେଚନର ସୁବିଧା କରିବା ପାଇଁ ଚାଷୀ ଦାବି କରିଛନ୍ତି ।