ଡି ଭିଲିୟର୍ସ ବିସ୍ଫୋରଣରେ ରାଜସ୍ଥାନ ଧରାଶାୟୀ

ଦୁବାଇ, (ବଡ଼ ଖବର ବ୍ୟୁରୋ): ଆଇପିଏଲର ତ୍ରୟୋଦଶ ସିଜନର ୩୩ତମ ମ୍ୟାଚ୍ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ନାମରେ ନାମିତ ହୋଇଛି । ଶନିବାର ଦୁବାଇରେ ରାଜସ୍ଥାନ ରୟାଲ୍ସ (ଆରଆର)କୁ ୭ ୱିକେଟରେ ପରାସ୍ତ କରିଛି ବାଙ୍ଗାଲୋର । ୧୯.୪ ଓଭରରେ ୧୭୯/୩ ସ୍କୋର କରି ଆରସିବି ବିଜୟର ଲକ୍ଷ୍ୟ ହାସଲ କରିଛି । ଏବି ଡି ଭିଲିୟର୍ସ ବାଙ୍ଗାଲୋରର ବିଜୟର ହିରୋ ଥିଲେ, ଯିଏ ୨୨ ବଲରୁ ଅପରାଜିତ ୫୫ ରନ ସ୍କୋର କରିଥିଲେ। ଡି ଭିଲିୟର୍ସଙ୍କ ଇନିଂସରେ ୬ଟି ଛକା ଅନ୍ତର୍ଭୁକ୍ତ ହୋଇଥିଲା । ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଚଳିତ ସିଜନରେ ୧୨ ପଏଣ୍ଟ ସହ ପଏଣ୍ଟ ଟେବୁଲର ତୃତୀୟ ସ୍ଥାନରେ ରହିଛି । ଅନ୍ୟପକ୍ଷରେ ରାଜସ୍ଥାନର ଏହା ଷଷ୍ଠ ପରାଜୟ ସହ ପଏଣ୍ଟ ଟେବୁଲରେ ସପ୍ତମ ସ୍ଥାନରେ ରହିଛି।

ପ୍ରଥମେ ବ୍ୟାଟିଂ କରି ରାଜସ୍ଥାନ ରୟାଲ୍ସ ଅଧିନାୟକ ଷ୍ଟିଭ୍ ସ୍ମିଥ୍‌ଙ୍କ ୫୭ ରନ ଓ ରବିନ ଉଥପ୍ପାଙ୍କ ୪୧ ରନ ବଳରେ ନିର୍ଦ୍ଧାରିତ ଓଭରରେ ୬ ଓ୍ଵିକେଟ୍ ବିନିମୟରେ ୧୭୭ ରନ କରିଥିଲା।
୧୭୮ ରନର ବିଜୟ ଲକ୍ଷ୍ୟକୁ ପିଛା କରିଥିବା ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ୨୩ରନ ସ୍କୋରରେ ଆରୋନ ଫିଞ୍ଚଙ୍କ ଓ୍ଵିକେଟ୍ ହରାଇଥିଲା। ଏହା ପରେ ଦେବିଦତ୍ତ ପାଡିକଲ ଓ ଅଧିନାୟକ ବିରାଟ କୋହଲି ଦଳର ଇନିଂସକୁ ଆଗକୁ ବଢାଇଥିଲେ। ଦୁଇ ବ୍ୟାଟସମ୍ୟାନ ଦଳର ସ୍କୋରକୁ ୧୦୨ରେ ପହଞ୍ଚାଇଥିଲେ। ଏହି ସ୍କୋରରେ ବେଙ୍ଗାଲୁରୁ ଲଗାତାର ଦୁଇଟି ଓ୍ଵିକେଟ୍ ହରାଇଥିଲା।
ଏବି ଡିଭିଲିୟର୍ସ କ୍ରିଜକୁ ଆସିବା ମାତ୍ରେ ଧୂଆଁଧାର ବ୍ୟାଟିଂ କରିଥିଲେ। ଶେଷ ୪ ଓଭରରୁ ଦଳକୁ ଜିତିବା ପାଇଁ ୫୪ରନ ଦରକାର ଥିଲା। ହେଲେ ଏବି ଡିଭିଲିୟର୍ସଙ୍କ ଅବିଶ୍ଵସନୀୟ ବ୍ୟାଟିଂ ବଳରେ ବେଙ୍ଗାଲୁରୁ ଏହି ମ୍ୟାଚରେ୧୯.୪ ଓଭରରେ ୩ ଓ୍ଵିକେଟ୍ ହରାଇ ବିଜୟ ଲକ୍ଷ୍ୟ ହାସଲ କରିଛି।