ଭୁବନେଶ୍ୱର, (ବଡ଼ ଖବର ବ୍ୟୁରୋ): ଆଗାମୀ ଉପନିର୍ବାଚନକୁ ଦୃଷ୍ଟିରେ ରଖି ରାଜନୈତିକ ବିଜ୍ଞାପନ ଉପରେ ରୋକ୍ ଲଗାଇଛନ୍ତି ନିର୍ବାଚନ ଆୟୋଗ। ଭାରତ ନିର୍ବାଚନ ଆୟୋଗ ସମ୍ବିଧାନର ଧାରା ୩୨୪ ଅନୁଯାୟୀ ନିର୍ବାଚନ ସମୟରେ କୌଣସି ରାଜନୈତିକ ଦଳ, ପ୍ରାର୍ଥୀ କିମ୍ବା ସଂସ୍ଥା ଦ୍ୱାରା ଭୋଟଗ୍ରହଣ ଦିନ ଏବଂ ଭୋଟଗ୍ରହଣ ପୂର୍ବଦିନ ଅର୍ଥାତ ନଭେମ୍ବର ୨ ଏବଂ ୩ ତାରିଖରେ ଛାପା ଗଣମାଧ୍ୟମରେ ବିଜ୍ଞାପନ ଛାପିବା ଉପରେ ରୋକ୍ ଲଗାଇଛନ୍ତି। ଯେପର୍ୟ୍ୟନ୍ତ ବିଜ୍ଞାପନର ବିଷୟବସ୍ତୁ ରାଜ୍ୟ କିମ୍ବା ଜିଲ୍ଲା ସ୍ତରରେ ଖୋଲା ଯାଇଥିବା ଏମ.ସି.ଏମ.ସି. କମିଟି ଦ୍ୱାରା ଅନୁମୋଦନ ଲାଭ କରିନାହିଁ ସେପର୍ୟ୍ୟନ୍ତ ରାଜନୈତିକ ବିଜ୍ଞାପନଗୁଡ଼ିକ ଛାପା ଗଣମାଧ୍ୟମରେ ପ୍ରକାଶିତ ହୋଇପାରିବ ନାହଁ। ଏନେଇ ନିର୍ବାଚନ ଆୟୋଗ ସୂଚନା ଅଧିକାରୀ ପ୍ରଫୁଲ୍ଲ କୁମାର ମଲ୍ଲିକ ଏକ ନିର୍ଦ୍ଦେଶନାମାରେ ସ୍ପଷ୍ଟ କରିଛନ୍ତି।
