ଭଦ୍ରକ,(ବଡ଼ ଖବର ବ୍ୟୁରୋ): ମଦବେପାରୀଙ୍କ ମାଡରେ ୭ ଅବକାରୀ କର୍ମଚାରୀ ଆହତ । ବେଆଇନ ମଦ ଜବତ କରିବା ସମୟରେ ହୋଇଛି ଆକ୍ରମଣ । ଏଭଳି ଅଭାବନୀୟ ଘଟଣା ଘଟିଛି ଭଦ୍ରକ ଜିଲ୍ଲା ପୁରୁଣାବଜ଼ାର ଥାନା ମିର୍ଜାପୁର ଅଞ୍ଚଳରେ । ବେଆଇନ ଭାବେ ଦେଶୀ ମଦ କାରବାର କରୁଥିବା ଖବର ପାଇ ଅବକାରୀ ବିଭାଗ ପକ୍ଷରୁ ମିର୍ଜାପୁର ଅଞ୍ଚଳରେ ଚଢ଼ାଉ କରି ୫୦ ଲିଟର ଦେଶୀ ମଦ ଜବଦ କରିବାସହ ୨ଜଣକୁ ଗିରଫ କରିଥିଲା ଅବକାରୀ ବିଭାଗ । ଘଟଣା ସ୍ଥଳରୁ ମଦବେପାରୀମାନେ ଅବକାରୀ ଅଧିକାରୀଙ୍କୁ ମାଡ ମାରି ଦୁଇ ଆସାମୀ ସହ ମଦକୁ ମଧ୍ୟ ଛଡାଇ ନେଇ ଥିବା ଅଭିଯୋଗ ହୋଇଛି । ଆହତ ହୋଇଥିବା ଅବକାରୀ କର୍ମଚାରୀମାନଙ୍କୁ ଭଦ୍ରକ ମୁଖ୍ୟ ଚିକିତ୍ସାଳୟରେ ଭର୍ତ୍ତୀ କରାଯାଇ ଚିକିତ୍ସା କରାଯାଇଛି ।
ସୂଚନା ଅନୁଯାୟୀ, ପୁରୁଣାବଜାର ଥାନା ମିର୍ଜାପୁର ଅଞ୍ଚଳରେ ଅବାଧ ମଦ କାରବାର ଦିନକୁ ଦିନ ବଢିଚାଲିଛି । ବାରମ୍ବାର ଅବକାରୀ ବିଭାଗ, ପୋଲିସ ଚଢ଼ାଉ କରି ମଦ ଜବତ କରିବା ସହ ଅଭିଯୁକ୍ତ ମାନଙ୍କୁ ଗିରଫ କରୁଛି କିନ୍ତୁ ତାହା ବନ୍ଦ ହେବାର ନା ନେଉନାହିଁ । ଆଜି ମଧ୍ୟ ଭଦ୍ରକ ଅବକାରୀ ବିଭାଗ ମିର୍ଜାପୁର ଅଞ୍ଚଳକୁ ଯାଇ ମଦ ଜବତ କରିବା ସହ ଦୁଇ ଆସାମୀଙ୍କୁ ଧରିଥିଲା । ଏଥିରେ ଉତକ୍ଷିପ୍ତ ହୋଇ ବେଆଇନ ଭାବେ ମଦ କାରବାର କରୁଥିବା ମଦବେପାରୀମାନେ ଅବକାରୀ ବିଭାଗର କର୍ମଚାରୀ ମାନଙ୍କୁ ମାଡ଼ ମାରିବା ସହିତ ଜବତ ହୋଇଥିବା ଦେଶୀ ମଦ ସହ ଅଭିଯୁକ୍ତ ମାନଙ୍କୁ ଖସାଇ ନେଇଥିଲେ । ଅବକାରୀ ବିଭାଗର କର୍ମଚାରୀଙ୍କୁ ଗାଁରେ ଅଟକାଇଥିଲେ । ପରେ ପୁରୁଣାବଜାର ପୋଲିସ ଘଟଣାସ୍ଥଳରେ ପହଞ୍ଚି ଅବକାରୀ କର୍ମଚାରୀଙ୍କୁ ଉଦ୍ଧାର କରିଛି ।
