ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଦୀର୍ଘ ଦିନ ଧରି ଅସୁସ୍ଥ ହେବା ପରେ ହିମାଚଳପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ତଥା କଂଗ୍ରେସର ବରିଷ୍ଠ ନେତା ବୀରଭଦ୍ର ସିଂଙ୍କ ପରଲୋକ । ଗୁରୁବାର ସକାଳେ ଶିମଲାରେ ମୃତ୍ୟୁ ବରଣ କରିଛନ୍ତି। ୮୭ ବର୍ଷରେ ତାଙ୍କର ଦେହାନ୍ତ ଘଟିଛି । ଇନ୍ଦିରା ଗାନ୍ଧୀ ମେଡିକାଲ କଲେଜ (ଆଇଜିଏମସି) ରେ ସକାଳ ୩.୪୦ ରେ ଶେଷ ନିଶ୍ୱାସ ତ୍ୟାଗ କରିଛନ୍ତି ବୋଲି ଡା. ଜନକ ରାଜ କହିଛନ୍ତି। ବୀରଭଦ୍ର ଦୁଇ ମାସ ମଧ୍ୟରେ ଦ୍ୱିତୀୟ ଥର ପାଇଁ କରୋନାରେ ଆକ୍ରାନ୍ତ ହୋଇଥିଲେ । ୯ ଥର ବିଧାୟକ ଏବଂ ୫ ଥର ସାଂସଦ ଭାବେ କାମ କରିଥିଲେ ।
ସିଂ ହିମାଚଳପ୍ରଦେଶର ୬ ଥର ମୁଖ୍ୟମନ୍ତ୍ରୀ ଭାବରେ ମଧ୍ୟ କାମ କରିଥିଲେ । ପୂର୍ବରୁ ୧୯୮୩ ରୁ ୧୯୯୦, ୧୯୯୩ ରୁ ୧୯୯୮, ୨୦୦୩ ରୁ ୨୦୦୭ ଏବଂ ୨୦୧୨ ରୁ ୨୦୧୭ ପର୍ଯ୍ୟନ୍ତ ସିଏମ୍ ଭାବରେ କାର୍ଯ୍ୟ କରିଥିଲେ। ମାର୍ଚ୍ଚ ୧୯୯୮ ରୁ ମାର୍ଚ୍ଚ ୨୦୦୩ ପର୍ଯ୍ୟନ୍ତ ବିରୋଧୀ ଦଳର ନେତା ରହିଥିଲେ। ଭେଟେରାନ ନେତା ୧୯୬୨ ମସିହାରେ ଲୋକସଭାରେ ପ୍ରବେଶ କରିଥିଲେ । ୧୯୬୭ ଏବଂ ୧୯୭୧ ନିର୍ବାଚନରେ ସେହି ସଫଳତାର ପୁନରାବୃତ୍ତି କରିଥିଲେ। ସିଂ କେନ୍ଦ୍ର ଡେପୁଟି ମନ୍ତ୍ରୀ, ପର୍ଯ୍ୟଟନ ଏବଂ ବେସାମରିକ ବିମାନ ଚଳାଚଳ, ଶିଳ୍ପ ମନ୍ତ୍ରୀ, କେନ୍ଦ୍ର ଇସ୍ପାତ ମନ୍ତ୍ରୀ ଭାବରେ କାର୍ଯ୍ୟ କରିଥିଲେ।
