ଗଞ୍ଜେଇ ଚୋରାଚାଲଣ ବେଳେ ଧରିଲା ପୋଲିସ

କଟକ, (ବଡ଼ ଖବର ବ୍ୟୁରୋ): ରାଜ୍ୟରେ ଦିନକୁ ଦିନ ବଢ଼ିବାରେ ଲାଗିଛି ନିଶା କାରବାର । ବାରମ୍ବାର ଚଢ଼ାଉ ଓ ଗିରଫ ପରେ ମଧ୍ୟ ବେଧଡ଼କ ସେମାନଙ୍କ ନେଟୱାର୍କ ବଢ଼େଇ ଚାଲିଛନ୍ତି ନିଶା ବେପାରୀ । ରାଜ୍ୟର ବିଭିନ୍ନ ସ୍ଥାନରୁ ପ୍ରତିଦିନ କିଲୋ କିଲୋ ଗଞ୍ଜେଇ ଜବତ ହେଉଛି ତଥାପି ସୁଧୁରୁନହାନ୍ତି ବେପାରୀ । ଗତକାଲି ସନ୍ଧ୍ୟାରେ କଟକ ମର୍କତନଗର ଥାନା ପୋଲିସ ଦୁଇ ଗଞ୍ଜେଇ ବେପାରୀଙ୍କୁ କାବୁ କରିବା ସହ ସେମାନଙ୍କ ନିକଟରୁ ୭କିଲୋରୁ ଅଧିକ ଓଜନର ଗଞ୍ଜେଇ ଜବତ କରିଛି । ଗିରଫ ଦୁଇ ଅଭିଯୁକ୍ତ ସଦର ଥାନା ଅନ୍ତର୍ଗତ ବାଲିଆ ଗ୍ରାମର ବାପୁଜୀ ନାୟକ ଓ ରାଜକିଶୋର ରାଉଳ । କୌଣସି ସୂତ୍ରରୁ ଖବର ପାଇ ପୋଲିସ ନରାଜପଟୁ ଆସୁଥିବା ଏକ ଧଳା ଆପାଚି ବାଇକର ପିଛାକରି ଉଭୟଙ୍କୁ କାବୁ କରିଥିଲା । କନ୍ଧମାଳରୁ ଏମାନେ ଗଞ୍ଜେଇ ଆଣି କଟକରେ ବିକ୍ରି କରୁଥିବା ତଦନ୍ତରୁ ଜଣାପଡ଼ିଛି ।