ସତ୍ୟବାଦୀ, (ବଡ଼ ଖବର ବ୍ୟୁରୋ): ପୁରୀ ଜିଲ୍ଲା ସତ୍ୟବାଦୀ ବ୍ଲକରେ ତେଜିଲା ଉତ୍ତରପ୍ରଦେଶ ହାଥରାସ ଗଣବଳାତ୍କାର ତାତି । ଗଣବାଳତ୍କାର ପରେ ହତ୍ୟାର ଶିକାର ହୋଇଥିବା ହାଥରାସର ୧୯ ବର୍ଷୀୟ ଯୁବତୀଙ୍କୁ ନ୍ୟାୟ ଓ ତୁରନ୍ତ ଅପରାଧୀମାନଙ୍କୁ ଦଣ୍ଡିତ କରିବା ଦାବିରେ ଶୁକ୍ରବାର ସନ୍ଧ୍ୟାରେ ସତ୍ୟବାଦୀ ଛାତ୍ର ବିଜୁ ଜନତା ଦଳ ପକ୍ଷରୁ ଏକ କ୍ୟାଣ୍ଡେଲ ଶୋଭାଯାତ୍ରା କରାଯାଇଥିଲା । ଏହି ଅବସରରେ ଛାତ୍ର ବିଜେଡି ସଦସ୍ୟମାନେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିରୋଧରେ ନାରାବାଜି କରିଥିଲେ । ପରେ ଏକ ପ୍ରତିବାଦ ସଭା ଆୟୋଜନ କରାଯାଇଥିଲା ।
ଉତ୍ତରପ୍ରଦେଶ ହାଥରାସ ଘଟଣା ନେଇ ସାରା ଦେଶରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ପୀଡ଼ିତାଙ୍କ ମୃତଦେହ ପରିବାର ଲୋକଙ୍କୁ ହସ୍ତାନ୍ତର ନ କରି ପ୍ରଶାସନ ରାତିଅଧିଆ ସତ୍କାର କରିବାକୁ ନେଇ ନାନା ସନ୍ଦେହ ସୃଷ୍ଟି କରିଛି । ପ୍ରମାଣ ନଷ୍ଟ କରି ଘଟଣାକୁ ଚାପିଦେବାକୁ ୟୁପି ପ୍ରଶାସନ ଉଦ୍ୟମ କରିଛି ବୋଲି ଛାତ୍ର ବିଜେଡି ଅଭିଯୋଗ କରିଥିଲା । କଂଗ୍ରେସ ନେତା ରାହୁଲ ଗାନ୍ଧି, ମହାସଚିବ ପ୍ରିୟଙ୍କା ଗାନ୍ଧିଙ୍କ ସମେତ ଗଣମାଧ୍ୟମ ପ୍ରତିନିଧିମାନେ ପୀଡ଼ିତାଙ୍କ ପରିବାରକୁ ଭେଟିବାକୁ ଯିବାବେଳେ ପୋଲିସ ସେମାନଙ୍କୁ ନ ଛାଡ଼ିବା, ରାହୁଲ ଗାନ୍ଧିଙ୍କୁ ଧକ୍କା ମାରି ତଳେ ପକାଇବା, ଅନ୍ୟ କର୍ମକର୍ତ୍ତାଙ୍କୁ ଲାଠିରେ ଆକ୍ରମଣ କରିବା, ଖବର ପ୍ରସାରଣରେ ଗଣମାଧ୍ୟମକୁ ବାଧା ଦେବା ଘଟଣା ଅତ୍ୟନ୍ତ ନିନ୍ଦନୀୟ ।
ଏହା ଗଣତନ୍ତ୍ରର ହତ୍ୟା ବୋଲି ସେମାନେ ଅଭିଯୋଗ କରିଥିଲେ । ସତ୍ୟବାଦୀ ନିର୍ବାଚନ ମଣ୍ଡଳୀ ବିଜୁ ଛାତ୍ର ଜନତା ସଭାପତି ବିଶ୍ଵଜିତ ପରିଡ଼ାଙ୍କ ନେତୃତ୍ୱରେ ଅନେକ ଛାତ୍ରନେତା ଏଥିରେ ଯୋଗଦେଇଥିଲେ ।
