ଆଜି ୧୬, କାଲି ୧୧

ଭୁବନେଶ୍ୱର, (ବଡ଼ ଖବର ବ୍ୟୁରୋ): ଲଘୁଚାପ ଯୋଗୁ ଅଧା ଓଡ଼ିଶାରେ ପ୍ରବଳରୁ ଅତି ପ୍ରବଳ ବର୍ଷା ଲାଗି ରହିଛି । ପାଣିପାଗ ବିଭାଗ ସୂଚନା ଅନୁଯାୟୀ ବର୍ଷା ଆସନ୍ତା ସୋମବାର ପର୍ଯ୍ୟନ୍ତ ଲାଗି ରହିବ ।

ପ୍ରବଳରୁ ଅତି ପ୍ରବଳ ବର୍ଷା ଯୋଗୁ ଜୀବନଯାତ୍ରା ବାଧାପ୍ରାପ୍ତ ହୋଇଛି । ରାଜଧାନୀ ଭୁବନେଶ୍ୱର ସମେତ କଟକର ସ୍ଥିତି ବେହାଲ ହୋଇ ପଡ଼ିଛି । ଅଧିକାଂଶ ସ୍ଥାନରେ ରାସ୍ତା ବୁଡ଼ି ପାଣି ଚାଲୁଛି । କେଉଁଠି ଘରେ ପାଣି ପଶିଲାଣି ତ ଆଉ କେଉଁଠି ରାସ୍ତାରେ ଗାଡ଼ି ବୁଡ଼ିବା ସ୍ଥିତି ହେଲାଣି । ତଳିଆ ଅଞ୍ଚଳ ବା ବସ୍ତି ଅଞ୍ଚଳଗୁଡ଼ିକରେ ପାଣି ଜମି ରହିଛି । କଟକ ସମେତ ଉପକୂଳ ଓଡ଼ିଶାର ପ୍ରାୟ ସମସ୍ତ ସହରରେ ସ୍ଥିତି ସମାନ ।

ସ୍ୱତନ୍ତ୍ର ରିଲିଫ କମିଶନରଙ୍କ ପକ୍ଷରୁ ସହରର ରାସ୍ତାରେ ପାଣି ଜମିବା, ରାସ୍ତା ଖସରା ହେବା ଓ ଅଧିକ ଦୂର ଦୃଶ୍ୟ ନ ହେବା ଭଳି ସତର୍କତା ଜାରି କରାଯାଇଛି । ଏପରିକି ଗାଡ଼ି ଚାଳନା ପାଇଁ ମଧ୍ୟ ସତର୍କତା ଜାରି କରିଛନ୍ତି ଏସଆରସି ।

ପାଣିପାଗ କେନ୍ଦ୍ର ସୂଚନା ଅନୁଯାୟୀ ଆଜି ରାଜ୍ୟର ୧୬ ଜିଲ୍ଲାରେ ବର୍ଷା ହେବ । କେନ୍ଦ୍ରାପଡ଼ା, ଜଗତସିଂହପୁର, ପୁରୀ, ଗଞ୍ଜାମ, ଗଜପତି, ରାୟଗଡ଼ା, କଟକ, ଖୋର୍ଦ୍ଧା, ଢ଼େଙ୍କାନାଳ, ନୟାଗଡ଼, କନ୍ଧମାଳ, କଳାହାଣ୍ଡି, ବଲାଙ୍ଗୀର, ସୁବର୍ଣ୍ଣପୁର, ବୌଦ୍ଧ, ଅନୁଗୁଳ ଜିଲ୍ଳାରେ ପ୍ରବଳରୁ ଅତି ପ୍ରବଳ ବର୍ଷା ହେବ । ଏହି ସବୁ ଜିଲ୍ଲାରେ ୟେଲୋ ୱାର୍ଣ୍ଣିଂ ଜାରି କରାଯାଇଛି ।

ସେହିପରି ଆସନ୍ତା କାଲି ରବିବାର ୧୧ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି । ରବିବାର କଟକ, ଢେଙ୍କାନାଳ, କେନ୍ଦୁଝର, ଅନୁଗୁଳ, ଦେବଗଡ଼, ସମ୍ବଲପୁର, ସୁବର୍ଣ୍ଣପୁର, ବୌଦ୍ଧ, ଗଞ୍ଜାମ, ଗଜପତି ଓ କୋରାପୁଟରେ ବର୍ଷା ହେବ ବୋଲି ସୂଚନା ଦେଇଛି ପାଣିପାଗ ବିଭାଗ ।