ଆଜି ଭାରତ ଓ ଇଂଲଣ୍ଡ ମଧ୍ୟରେ ଖେଳାଯିବ ୱାର୍ମ ଅପ ମ୍ୟାଚ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଆଇସିସି ପୁରୁଷ ବିଶ୍ୱକପ୍କୁ ଆଉ ମାତ୍ର ୪ ଦିନ । ଏହା ପୂର୍ବରୁ ଆରମ୍ଭ ହୋଇଛି ୱାର୍ମ ଅପ୍ ମ୍ୟାଚ । ଶୁକ୍ରବାର ଠାରୁ ଆରମ୍ଭ ହୋଇଛି ଏହି ମ୍ୟାଚ । ଆଜି ଭାରତ ଓ ଇଂଲଣ୍ଡ ମଧ୍ୟରେ ଖେଳାଯିବ ଏହି ୱାର୍ମ ଅପ ମ୍ୟାଚ । ଗୌହାଟୀର ବର୍ଷାପରା କ୍ରିକେଟ ଷ୍ଟାଡିୟମରେ ଖେଳାଯିବ ଏହି ମ୍ୟାଚ । ରୋହିତ ଶର୍ମାଙ୍କ ନେତୃତ୍ୱରେ ୱାର୍ମଅପ ମ୍ୟାଚ ଖେଳିବାକୁ ପଡିଆକୁ ଓହ୍ଲାଇବ ଟିମ ଇଣ୍ଡିଆ । ଅପରାହ୍ନ ୨ ଟାରେ ଆରମ୍ଭ ହେବ ଏହି ମ୍ୟାଚ । ଏସିଆ କପ୍ ସହ ଅଷ୍ଟ୍ରେଲିଆ ବିପକ୍ଷ ଦିନିକିଆ ସିରିଜ୍ ଜିତିବା ପରେ ଭଲ ଲୟରେ ରହିଛନ୍ତି ରୋହିତ୍ ବାହିନୀ ।
ସେହିପରି ଇଂଲଣ୍ଡ ମଧ୍ୟ ନ୍ୟୁଜିଲାଣ୍ଡ ଓ ଆୟରଲାଣ୍ଡ ବିପକ୍ଷ ସିରିଜ୍ ଜିତିଛି । ୱାର୍ମଅପରେ ଭାରତର ବ୍ୟାଟିଂ ଉପରେ ରହିବ ସମସ୍ତଙ୍କ ନଜର ।ରୋହିତଙ୍କ ସହ ଶୁବମନ୍ ଗିଲ ଓପନ୍ କରିବେ । ମଧ୍ୟକ୍ରମରେ ବିରାଟ କୋହଲି, ରାହୁଲ ଓ ଆୟରଙ୍କୁ ସୁଯୋଗ ଦେଇପାରେ ଦଳ । ସେପଟେ ଆନୁଷ୍ଠାନିକ ମ୍ୟାଚ୍ ପୂର୍ବରୁ ୧୦ଟି ଟିମ୍ ଖେଳିବେ ଦୁଇଟି ଲେଖାଏଁ ଓ୍ବାର୍ମ ଅପ୍ ମ୍ୟାଚ୍ । ଶୁକ୍ରାବର ହାଇଦ୍ରାବାଦରେ ପାକିସ୍ତାନ ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯାଇଥିଲା ଅଭ୍ୟାସ ମ୍ୟାଚ । ଏହି ମ୍ୟାଚରେ ପାକିସ୍ତାନକୁ ୫ୱିକେଟରେ ପରାସ୍ତ କରିଛି ନୁ୍ୟଜିଲାଣ୍ଡ । ସେହିପରି ବାଂଲାଦେଶ ୭ ୱିକେଟରେ ଶ୍ରୀଲଙ୍କାକୁ ପରାସ୍ତ କରିଛି ।
