ଆଜି ଭାରତ-ଦକ୍ଷିଣ ଆଫ୍ରିକା ୩ୟ ଟି-୨୦, ମ୍ୟାଚ୍ ବରାବର ଲକ୍ଷ୍ୟରେ ଭାରତ
ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଆଜି ଭାରତ-ଦକ୍ଷିଣ ଆଫ୍ରିକା ୩ୟ ଟି-୨୦ ମ୍ୟାଚ । ଜୋହାନସବର୍ଗରେ ଖେଳାଯିବ ଏହି ମ୍ୟାଚ । ମ୍ୟାଚଟି ଭାରତ ପାଇଁ ‘କର ବା ମର’ ସ୍ଥିତି ହୋଇଛି । ପ୍ରଥମ ମ୍ୟାଚ୍ ବର୍ଷା ଯୋଗୁଁ ଧୋଇ ଯାଇଥିବା ବେଳେ ଦ୍ୱିତୀୟ ମୁକାବିଲାକୁ ଜିତିଥିଲା ଘରୋଇ ଦଳ । ବିଜୟ ସହ ଦକ୍ଷିଣ ଅଫ୍ରିକା ୧-୦ରେ ଆଗରେ ରହିଛି । ସିରିଜ୍ ବଞ୍ଚାଇବାକୁ ହେଲେ, ଭାରତକୁ ଆଜି ମ୍ୟାଚ୍ କୌଣସି ପରିସ୍ଥିତିରେ ଜିତିବାକୁ ପଡ଼ିବ ।
ଦ୍ୱିତୀୟ ମ୍ୟାଚରେ ରିଙ୍କୁ ସିଂହ ଓ ଅଧିନାୟକ ସୂର୍ଯ୍ୟକୁମାରଙ୍କ ବିସ୍ଫୋରକ ବ୍ୟାଟିଂ ଯୋଗୁଁ ଭାରତ ୧୮୦/୭ କରିଥିଲେ ମଧ୍ୟ ବର୍ଷା ବାଧାପ୍ରାପ୍ତ ଏହି ମ୍ୟାଚ୍ରେ ଘରୋଇ ଦଳକୁ ଡିଲ୍ଏସ୍ରେ ୧୫ ଓଭରରେ ୧୫୨ରନ୍ ଲକ୍ଷ୍ୟ ଦିଆଯାଇଥିଲା। ତେବେ ଘରୋଇ ଦଳ ଏହାକୁ ୧୩.୫ ଓଭରରେ ହାସଲ କରିନେବାରୁ ଭାରତକୁ ଶେଷ ମ୍ୟାଚ୍ ଜିତିବା ଅପରିହାର୍ଯ୍ୟ ହୋଇଯାଇଛି। ବିଶେଷକରି ବୋଲରମାନେ ବ୍ୟୟବହୁଳ ହୋଇଥିବାରୁ ଭାରତକୁ ଏହି ମ୍ୟାଚ୍ ହାତଛଡ଼ା କରିବାକୁ ପଡ଼ିଥିଲା। ଆଜି ମ୍ୟାଚରେ ଭାରତ ପାଇଁ ‘କର ବା ମର’ ସ୍ଥିତି ହୋଇଛି ।