ଆଜିଠୁ ଭାରତ-ୱେଷ୍ଟଇଣ୍ଡିଜ ପ୍ରଥମ ଦିନିକିଆ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଆଜିଠୁ ଭାରତ-ୱେଷ୍ଟଇଣ୍ଡିଜ ପ୍ରଥମ ଦିନିକିଆ । ଟେଷ୍ଟ ମ୍ୟାଚ ଜିତିବା ପରେ ଆଜିଠୁ ଭାରତୀୟ ଦଳ ୱେଷ୍ଟଇଣ୍ଡିଜ ବିପକ୍ଷରେ ତିନି ମ୍ୟାଚ୍ ବିଶିଷ୍ଟ ଦିନିକିଆ ଶୃଙ୍ଖଳା ଖେଳିବ। ଯଦିଓ ୱେଷ୍ଟଇଣ୍ଡିଜ୍ ବିଶ୍ବକପ୍ ପାଇଁ ଯୋଗ୍ୟତା ଅର୍ଜନ କରିପାରିନାହିଁ, କିନ୍ତୁ ବିଶ୍ବକପ୍ ପାଇଁ ଭାରତୀୟ ଦଳର ଏହା ଭଲ ଅଭ୍ୟାସ ହେବ। କେବଳ ଏତିକି ନୁହେଁ, ଉଭୟ ଦଳଙ୍କ ମଧ୍ୟରେ ଦ୍ବିପାକ୍ଷିକ ଶୃଙ୍ଖଳାରେ ୨୦୦୬ ମସିହା ପରଠୁ ଭାରତ କେବେ ବି ପରାଜିତ ହୋଇନଥିବାରୁ ରୋହିତ ଶର୍ମାଙ୍କ ଦଳ ଏହି ଧାରା ବଜାୟ ରଖିବାକୁ ଚାହିଁବ।ଦିନିକିଆ ଶୃଙ୍ଖଳାର ପ୍ରଥମ ଦୁଇ ମ୍ୟାଚ୍ ବାର୍ବାଡୋସ୍ରେ ଏବଂ ଶେଷ ମ୍ୟାଚ୍ ତ୍ରିନିଦାଦ୍ରେ ଖେଳାଯିବ।
ସମସ୍ତ ମ୍ୟାଚ୍ ସନ୍ଧ୍ୟା ୭ଟାରେ ଆରମ୍ଭ ହେବ। ଏହି ଶୃଙ୍ଖଳା ଜରିଆରେ ବିଶ୍ବକପ୍କୁ ଦୃଷ୍ଟିରେ ରଖି ସୂର୍ୟ୍ୟକୁମାର ଯାଦବ, ଈଶାନ କିଶନ, ସଞ୍ଜୁ ସାମସନ୍ ଓ ୟୁଝବେନ୍ଦ୍ର ଚହଲଙ୍କ ପ୍ରଦର୍ଶନ ଉପରେ ଅଧିକ ନଜର ରହିବ। ସୂର୍ୟ୍ୟକୁମାର ଟ୍ବେଣ୍ଟି-୨୦ ପ୍ରଦର୍ଶନକୁ ଦିନିକିଆରେ ଦେଖାଇବାରେ ବିଫଳ ହୋଇଛନ୍ତି। ଅଷ୍ଟ୍ରେଲିଆ ବିପକ୍ଷ ଶୃଙ୍ଖଳାରେ ହ୍ୟାଟ୍ରିକ୍ ‘ଶୂନ’ କରିବାରେ ବିରଳ ରେକର୍ଡ କରିଥିଲେ। ତେବେ ଶ୍ରେୟସ ଆୟରଙ୍କ ଅନୁପସ୍ଥିତିରେ ୪ ନମ୍ବର ସ୍ଥାନରେ ତାଙ୍କୁ ଖେଳାଯିବା ସମ୍ଭାବନା ରହିଛି। ରୋହିତ ଶର୍ମା ଓ ଶୁବମନ ଗିଲ୍ ପାଳି ଆରମ୍ଭ କରିପାରନ୍ତି। ଏପରି ହେଲେ ଋତୁରାଜ ଗାଏକ୍ବାଡଙ୍କୁ ଅଧିକ ସମୟ ବେଞ୍ଚରେ ବସିବାକୁ ପଡ଼ିପାରେ।