(ବଡ଼ ଖବର ବ୍ୟୁରୋ): ଶନିବାର ଜାମ୍ମୁ କାଶ୍ମୀରରେ ସୁରକ୍ଷା ବାହିନୀ ଏବଂ ଆତଙ୍କବାଦୀଙ୍କ ମଧ୍ୟରେ ଏକ ଏନକାଉଣ୍ଟର ଆରମ୍ଭ ହୋଇଛି। ସୁରକ୍ଷା ବାହିନୀର ଏକ ମିଳିତ ଦଳ ଏହି ଅପରେସନ୍ କରୁଛନ୍ତି । ଏହି ଏନକାଉଣ୍ଟରରେ ଦୁଇ ଆତଙ୍କବାଦୀ ନିହତ ହୋଇଥିବା ଜଣାଯାଇଛି। ଏହି ଏନକାଉଣ୍ଟରରେ ତିନି ଜଣ ଯବାନ ଆହତଙ୍କୁ ଡାକ୍ତରଖାନା ନିଆଯାଇଛି। ବର୍ତ୍ତମାନ ଅପରେସନ ଚାଲୁ ରହିଥିବା ଜଣାଯାଇଛି ।
ବାନ୍ଦିପୋରାର ସୋକବାବା ଜଙ୍ଗଲ ଅଞ୍ଚଳରେ ଆତଙ୍କବାଦୀଙ୍କ ଉପସ୍ଥିତି ସମ୍ପର୍କରେ ନିର୍ଦ୍ଦିଷ୍ଟ ସୂଚନା ପାଇବା ପରେ ବାନ୍ଦିପୋରା ପୋଲିସର ମିଳିତ ଦଳ ଚଢ଼ାଉ କରିଥିଲା । ଏହି ଚଢ଼ାଉରେ ସେନାର ୧୩ ଏବଂ ୧୪ ଆରଆର (ରାଷ୍ଟ୍ରିୟ ରାଇଫଲ୍ସ) ଏବଂ ସିଆରପିଏଫ ମିଶି ଏକ ସର୍ଚ୍ଚ ଅପରେସନ ଆରମ୍ଭ କରିଥିଲେ। କର୍ଡନ ହେବାର ଦେଖି ଆତଙ୍କବାଦୀମାନେ ଗୁଳି ଚଳାଇବା ଆରମ୍ଭ କରିଥିଲେ। ଏହା ପରେ ଯବାନମାନେ ମଧ୍ୟ ପଲେଟା ଆକ୍ରମଣ କରିଥିଲେ । ଏହା ସହିତ ଆତଙ୍କବାଦୀଙ୍କୁ ଆତ୍ମସମର୍ପଣ କରିବାର ସୁଯୋଗ ମଧ୍ୟ ଦେଇଥିଲେ । କିନ୍ତୁ ଆତଙ୍କବାଦୀମାନେ ଗୁଳି ଚଳାଇ ଚାଲିଥିଲେ। ଫଳସ୍ୱରୂପ ସୁରକ୍ଷା ବାହିନୀଙ୍କ ଦ୍ୱାରା ଦୁଇ ଆତଙ୍କବାଦୀ ନିହତ ହୋଇଥିଲେ। ତେବେ ଏହି ଏନକାଉଣ୍ଟରରେ ତିନି ଜଣ ଯବାନ ମଧ୍ୟ ଆହତ ହୋଇଛନ୍ତି ।
ଏହାପୂର୍ବରୁ ଶୁକ୍ରବାର ଦିନ ଉତ୍ତର କାଶ୍ମୀରର ବାରାମୁଲ୍ଲା ଜିଲ୍ଲାର ସୋପୋରରେ ରାତାରାତି ଏନକାଉଣ୍ଟରରେ ଲଶ୍କର କମାଣ୍ଡରଙ୍କ ସମେତ ଦୁଇ ଆତଙ୍କବାଦୀ ସୁରକ୍ଷା ବଳଙ୍କ ଦ୍ୱାରା ନିହତ ହୋଇଥିଲେ। ସେଥିରୁ ଦୁଇଟି ଏକେ ୫୬ ରାଇଫଲ, ଚାରିଟି ମାଗାଜିନ୍, ୧୩୬ କାର୍ଟ୍ରିଜ୍ ଏବଂ ଦୁଇଟି ବ୍ୟାଗ୍ ଉଦ୍ଧାର କରାଯାଇଥିଲା ।
