ମହାରାଷ୍ଟ୍ରରେ ବର୍ଷା, ଦୁଇ ଦିନରେ ଗଲାଣି ୧୨୯ ଜୀବନ

(ବଡ଼ ଖବର ବ୍ୟୁରୋ): ମହାରାଷ୍ଟ୍ରରେ କିଛିଦିନ ହେବ ବର୍ଷା ଲାଗି ରହିଛି । ଫଳରେ ସେଠାରେ ହଇଚଇ ସୃଷ୍ଟି ହୋଇଛି । ରାଜ୍ୟବାସୀଙ୍କ ପାଇଁ ବର୍ଷା ଏକ ସମସ୍ୟା ସୃଷ୍ଟି କରିଛି । ବର୍ଷା କାରଣରୁ ଗତ ଦୁଇଦିନ ମଧ୍ୟରେ ୧୨୯ ଜଣ ଲୋକ ପ୍ରାଣ ହରାଇଛନ୍ତି । ଗତ ୨୪ ଘଣ୍ଟା ମଧ୍ୟରେ ରାୟଗଡ଼, ରତ୍ନାଗିରି ଏବଂ ସାତାରାରେ ଅନେକ ଲୋକ ଅଳିଆ ଗଦାରେ ଫସି ରହିଛନ୍ତି । ଏନଡିଆରଏଫ ଏବଂ ଏସଡିଆରଏଫ ବ୍ୟତୀତ ନୌସେନା ଘଟଣାସ୍ଥଳରେ ପହଞ୍ଚି ଲୋକଙ୍କୁ ସୁରକ୍ଷିତ ସ୍ଥାନକୁ ନେଉଛନ୍ତି ।

ବର୍ତ୍ତମାନ ପର୍ଯ୍ୟନ୍ତ ୪୮ ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ଯୁଦ୍ଧକାଳୀନ ଭିତ୍ତିରେ ଏନଡିଆରଏଫ ଟିମ ରିଲିଫ ଏବଂ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି ।

ଗତ ତିନିଦିନ ଧରି ମହାରାଷ୍ଟ୍ର ଉପକୂଳ କୋଙ୍କଣ, ରାୟଗଡ଼ ଏବଂ ପଶ୍ଚିମ ମହାରାଷ୍ଟରେ ପ୍ରବଳ ବର୍ଷା ହୋଇଛି । ସମାନ ଅଞ୍ଚଳରେ ଅବସ୍ଥିତ ପ୍ରସିଦ୍ଧ ପର୍ଯ୍ୟଟନସ୍ଥଳ ମହାବଳେଶ୍ୱର ଗତ ତିନିଦିନ ମଧ୍ୟରେ ୧୫୦୦ ମିଲିମିଟର ବର୍ଷା ରେକର୍ଡ କରାଯାଇଛି । ଗୁରୁବାର ପ୍ରବଳ ବର୍ଷା କାରଣରୁ ରତ୍ନଗିରି ଜିଲ୍ଲାର ଚିପଲୁନ ସହରର ଏକ ବଡ଼ ଅଂଶ ଜଳମଗ୍ନ ହୋଇଯାଇଥିଲା । ଶୁକ୍ରବାର ଦିନ ଚିପଲୁନରେ ଜଳସ୍ତର ହ୍ରାସ ପାଇବା ପରେ ସେଠାରେ ହୋଇଥିବା କ୍ଷୟକ୍ଷତିର ପରିମାଣ ଦୃଶ୍ୟମାନ ହୋଇଥିଲା । ଅନେକ ଅଞ୍ଚଳରେ ପାହାଡରେ ଭୂସ୍କଳନ କାରଣରୁ ଶହେରୁ ଅଧିକ ଲୋକ ପାଣିରେ ଭାସି ଯାଇଥିଲେ ।