କେନ୍ଦ୍ରାପଡା, (ବଡ଼ ଖବର ବ୍ୟୁରୋ): ରାସ୍ତା ମଝିରେ ଘଣ୍ଟା ଘଣ୍ଟା ପଡି ରହିଲା ମୃତଦେହ । ଏହାକୁ ସମସ୍ତେ ଦେଖୁଥାନ୍ତି ସତ, କିନ୍ତୁ କେହି ନ ଦେଖିଲା ପରି ବାଟ କଡ଼ାଇ ଚାଲିଯାଉଥାନ୍ତି । ଏଭଳି ଏକ ହୃଦୟ ବିଦାରକ ଦୃଶ୍ୟ ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲ୍ଲା ଗରଦପୁର ଅଞ୍ଚଳରେ । ମୃତକ ଜଣକ ହେଉଛନ୍ତି ଜଣେ ଶ୍ରମିକ । ଘର ତାଙ୍କର ସୁଦୂର ଛତିଶଗଡ଼ । ବାପା ପୁଅ ଦୁଇଜଣ କେନ୍ଦ୍ରାପଡା ଜିଲ୍ଲାର ଗରଦପୁର ଅଞ୍ଚଳକୁ ସିମେଣ୍ଟ ଇଟା ଫାକ୍ଟ୍ରିରେ ଦାଦନ ଖଟିବାକୁ ଆସିଥିଲେ । କାମ କରି ଟଙ୍କା ନେଲେ ପରିବାର ଚଳେ । ଗତ ଦୁଇଦିନ ତଳେ ବାପାଙ୍କ ଦେହ ଖରାପ ହେବାରୁ ମାଲିକ ତାଙ୍କୁ ଆଣି ସ୍ଥାନୀୟ ଜଗନ୍ନାଥ ମନ୍ଦିରରେ ଶୁଆଇଦେଲେ । ପୁଅ ଵିଶାଲ ମାଲିକଙ୍କୁ ବାପାଙ୍କ ଚିକିତ୍ସା ପାଇଁ ଟଙ୍କା ମାଗିଲେ ହେଲେ ତାହା ବଦଳରେ ମାଲିକ ତାଙ୍କୁ ଜଳ ଉଦରି ହୋଇଥିବା କହି ଜଣେ ଲୋକଙ୍କୁ ଡ଼କାଇ ତାଙ୍କ ବାପାଙ୍କ ପେଟରେ ଛୁଞ୍ଚି ଆଣି ପାଣି ବାହାର କରିବାକୁ ଲାଗିଲେ । ଫଳରେ ତାଙ୍କ ବାପାଙ୍କ ମୃତ୍ୟୁ ହୋଇଥିଲା ।
ପରେ ତାଙ୍କ ଶବକୁ ମନ୍ଦିର ପରିସରରୁ କାଢି ନେଇ ଏକ ରାସ୍ତାକଡ଼ରେ ଫୋପାଡ଼ି ଦେଇଥିଲେ । ପରେ ଥାନାରେ କେଶ ହୋଇଯିବା ଭୟରେ ମୃତ ଶରୀରକୁ ନେଇ ଶବ ସତ୍କାର କରିଦେଲେ । ପରେ ବିଶାଲ ଜଣେ ନାବାଳକ ହୋଇଥିବାରୁ ତାଙ୍କୁ ଛତିଶଗଡ଼ ପଠାଇ ଦେବାର ବ୍ୟବସ୍ଥା କରିବାକୁ ବସିଛନ୍ତି । ତେବେ ସବୁଠାରୁ ବଡ଼ କଥା ହେଉଛି, ଘଟଣା ଘଟିଥିବା ସ୍ଥାନରୁ ସ୍ଥାନୀୟ ବ୍ଲକ, ତହସିଲ ଏବଂ ଥାନା ମାତ୍ର ଦୁଇ କିଲୋମିଟର ହୋଇଥିବା ବେଳେ ଏଭଳି ଏକ ଘଟଣା ଉପରେ କାହାରି ନଜର ପଡ଼ିଲା ନାହିଁ । ଅନ୍ୟପଟେ ଏହି ଘଟଣାକୁ ଦେଖି ନଦେଖିଲା ପରି ହେଲେ ନା କାହା ଚାପରେ ସ୍ଥାନୀୟ ପ୍ରଶାସନ ଚୁପ୍ ରହିଲା ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି ।
