ଦନ୍ତା ନେଲା ୨ଜୀବନ
ଲାଠିକଟା (ବଡ଼ ଖବର ବ୍ୟୁରୋ): ଲାଠିକଟା ବ୍ଲକ ପାନପୋଷ ଫରେଷ୍ଟ ରେଞ୍ଜରେ ଆଜି ସକାଳୁ ଦନ୍ତା ନେଇଛି ଦୁଇଜଣଙ୍କ ଜୀବନ । କନରସୁଆଁ ଟୁଙ୍ଗିରିଟୋଲୀ ଗ୍ରାମର କାର୍ତ୍ତିକ କ ଭୂମିଜ (୮୦) ଭୋରରୁ ଶୌଚ ହୋଇ ଫେରୁଥିବା ବେଳେ ଦନ୍ତାହାତୀ ସହିତ ମୁଁହାମୁଁହି ହୋଇଥିଲେ । ସେହି ସମୟରେ ଦନ୍ତାଟି କାର୍ତ୍ତିକଙ୍କୁ ଶୁଣ୍ଢରେ କଚାଡି ଦେଇଥିଲା । କାର୍ତ୍ତିକ ଯନ୍ତ୍ରଣାରେ ଛଟପଟ ହେଉଥିବା ବେଳେ ଦନ୍ତା ଦଳି ଦେଇଥିଲା । ଘଟଣାସ୍ଥଳରେ କାର୍ତ୍ତିକଙ୍କ ଜୀବନ ଚାଲିଯାଇଥିଲା ।
ସେହିପରି କନରସୁଆଁ ଟୁଙ୍ଗିରିଟୋଲୀ ଗ୍ରାମର କିଛି ଦୂରରେ ଥିବା ଡେଲାକୁଦର ଠେପାଟୋଲୀ ଗ୍ରାମର ଗାନ୍ଦରୁ ତିର୍କୀ (୮୫) ସକାଳେ ନିଜ ବାଡ଼ିରେ କାମ କରୁଥିଲେ । ଏହି ସମୟରେ ୫ ଫୁଟର ପାଚେରୀ ଭାଙ୍ଗି ଦନ୍ତାହାତୀଟି ତାଙ୍କୁ ଘୋଜରେ ଦଳି ଦେଇଛି । ଲାଠିକଟା ବନବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ଅଧିକ ତଦନ୍ତ ଜାରି ରଖିଛନ୍ତି ।