ବଙ୍ଗରେ ଦିଦିଙ୍କ ହ୍ୟାଟ୍ରିକ

କୋଲକାତା(ବଡ଼ ଖବର ବ୍ୟୁରୋ): ବଙ୍ଗରେ ମମତାଙ୍କ ହ୍ୟାଟ୍ରିକ । ଲଗାତାର ତୃତୀୟ ଥର ଭାବେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ଗାଦି ସମ୍ଭାଳିଛନ୍ତି ମମତା ବାନାର୍ଜୀ । ଏନେଇ ଆଜି ପଦ ଓ ଗୋପନୀୟତାର ଶପଥ ପାଠ କରାଇଥିଲେ ରାଜ୍ୟପାଳ ଜଗଦୀପ ଧନଖର । ରାଜଭବନ ଟାଉନ ହଲରେ ଆଜି ଶପଥ ନେଇଛନ୍ତି ମମତା । ଦିଦି ନିଜ ବଙ୍ଗାଳୀ ଭାଷାରେ ଶପଥ ନେଇଥିଲେ । ରାଜ୍ୟ କ୍ୟାବିନେଟ ଓ ମନ୍ତ୍ରୀ ପରିଷଦମାନେ ମେ ୯ ବିଶ୍ୱକବି ରବୀନ୍ଦ୍ରନାଥ ଠାକୁରଙ୍କ ଜୟନ୍ତୀରେ ଶପଥ ଗ୍ରହଣ କରିବାର କାର୍ଯ୍ୟକ୍ରମ ରହିଛି ।

ପଶ୍ଚିମବଙ୍ଗରେ ୨୯୪ ଆସନରୁ ୨୯୨ ଆସନରେ ଭୋଟ ହୋଇଥିଲା । ୨୧୩ ଆସନରେ ବିଜୟୀ ଲାଭ କରିଛି ତୃଣମୂଳ କଂଗ୍ରେସ । ସେପଟେ ତୃତୀୟ ଥର ପାଇଁ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିବା ମମତା ବାନାର୍ଜୀ ବିଧାନସଭା ସହ ସାତ ଥର ଲୋକସଭାକୁ ମଧ୍ୟ ନିର୍ବାଚିତ ହୋଇଛନ୍ତି । ୧୯୮୪ରେ ପ୍ରଥମ ଥର ପାଇଁ ସାଂସଦ ହୋଇଥିଲେ । ୧୯୯୧ରେ ଦ୍ୱିତୀୟ, ୧୯୯୬ରେ ତୃତୀୟ ଥର ଭାବେ ସାଂସଦ ଭାବେ ର୍ନିବାଚିତ ହୋଇଥିଲେ । ଏହାପରେ ୧୯୯୭ରେ ତୃଣମୂଳ କଂଗ୍ରେସର ସ୍ଥାପନ କରିଥିଲେ ମମତା ବାନାର୍ଜୀ । ୧୯୯୧ରୁ ୨୦୦୧ ମଧ୍ୟରେ ରେଳ ମନ୍ତ୍ରୀ ଭାବେ କାର୍ଯ୍ୟ କରିସାରିଛନ୍ତି । ୨୦୦୩ରୁ ୨୦୦୪ରେ କ୍ୟାବିନେଟ ମନ୍ତ୍ରୀ ଭାବେ କାର୍ଯ୍ୟ କରିଛନ୍ତି ।