ମମିତା ମେହେର ନିଖୋଜ ମିଷ୍ଟ୍ରି
(ବଡ଼ ଖବର ବ୍ୟୁରୋ): ମମିତା ମେହେର ନିଖୋଜ ମିଷ୍ଟ୍ରି । ମାଟି ତଳୁ ମିଳିଲା ପୋଡ଼ା ଅଂଶ । ପାଉଁଜି, ସୁନା ଚେନ୍, ବ୍ୟାଗ ଉଦ୍ଧାର କରିଛି ପୋଲିସ । ଯାହା ଶିକ୍ଷୟତ୍ରୀ ମମିତା ମେହେରଙ୍କ ବୋଲି ଚିହ୍ନଟ କରିଛନ୍ତି ପରିବାର । ଖାଲି ସେତିକି ନୁହେଁ ମିଳିଛି ଦଗ୍ଧ ମୃତଦେହ । କଳାହାଣ୍ଡି ମହାଲିଙ୍ଗ ସନସାଇନ ସ୍କୁଲର ଶିକ୍ଷୟତ୍ରୀ ମମିତା ମେହେର ନିଖୋଜ ଘଟଣାରେ ପୋଲିସ କରୁଥିଲା ତନାଘନା ।
ସକାଳେ ସ୍କୁଲ ଷ୍ଟାଡିୟମରେ ଦୀର୍ଘ ୩ ଘଣ୍ଟାରୁ ଅଧିକ ହୋଇଥିଲା ଖୋଳାଖୋଳି । ୭ ଫୁଟରୁ ଅଧିକ ଖୋଳିବା ପରେ ମିଳିଥିଲା ଦଗ୍ଧ ମୃତହେହ । ପାଖରେ ପଡ଼ିଥିଲା ପୋଡା କାଠ । ମୃତଦେହଟି ସଂପୂର୍ଣ୍ଣ ଭାବେ ପୋଡ଼ି ଯାଇଥିବାରୁ ତାକୁ ଚିହ୍ନବା ସହଜ ନଥିଲା । ମୃତଦେହଟି ସଂପୂର୍ଣ୍ଣ ନଷ୍ଟ ହୋଇଯାଇଥିବାରୁ ଡିଏନଏ ଟେଷ୍ଟ ହେବ ବୋଲି କହିଛି ପୋଲିସ । ଖୋଳିବା ସମୟରେ ମମିତାଙ୍କ ସଂପର୍କୀୟ ଉପସ୍ଥିତ ଥିଲେ ।
ସବୁଠାରୁ ବଡ଼ କଥା ହେଉଛି ଯେଉଁ ଷ୍ଟାଡିୟମରେ ମମିତାଙ୍କୁ ପୋଡ଼ାଯାଇ ପୋତା ଯାଇଥିଲା ସେହି ଷ୍ଟାଡିୟମର ନିର୍ମାଣ ଦାୟିତ୍ୱ ମୋଷ୍ଟ ୱାଣ୍ଟେଡ ଗୋବିନ୍ଦ ସାହୁ ନେଇଥିଲା । ମମିତାଙ୍କ ପ୍ରମାଣ ନଷ୍ଟ କରିବା ପାଇଁ ସବୁ ବ୍ୟବସ୍ଥା କରିଥିଲା ଗୋବିନ୍ଦ ସାହୁ । ଏଭଳି ଅଭିଯୋଗ କରିଛନ୍ତି ମମିତାଙ୍କ ପରିବାର ।
ସେପଟେ ଷ୍ଟାଡିୟମ ଖୋଳାଯାଉଛି, ଏବଂ ମମିତାଙ୍କ ମୃତଦେହ ମିଳିବା ଖବର ପ୍ରଘଟ ହେବା ପରେ ଘଟଣା ସ୍ଥଳରେ ସ୍ଥାନୀୟ ଲୋକଙ୍କ ଗହଳି ଦେଖିବାକୁ ମିଳିଥିଲା । ଲୋକସଂଖ୍ୟାକୁ ଦୃଷ୍ଟିରେ ରଖି ଷ୍ଟାଡିୟମରେ କରାଯାଇଥିଲା ପୋଲିସ ଛାଉଣି ।