ଦୁର୍ଗା ପୂଜା ଭଳି କଟକଣାରେ ପାଳିତ ହେବ ଲକ୍ଷ୍ମୀ ପୂଜା, କାଳୀ ପୂଜା, କାର୍ତ୍ତିକ ପୂର୍ଣ୍ଣିମା…

ଭୁବନେଶ୍ୱର (ବଡ଼ ଖବର ବ୍ୟୁରୋ): ଲକ୍ଷ୍ମୀ ପୂଜା, କାଳୀ ପୂଜା, କାର୍ତ୍ତିକ ପୂର୍ଣ୍ଣିମା ପାଇଁ ଗାଇଡଲାଇନ ଜାରି କଲା ବିଏମସି।  କୋଭିଡ୍-୧୯କୁ ଦୃଷ୍ଟିରେ ରଖି ଦୁର୍ଗା ପୂଜା ଭଳି ଏହି ସବୁ ପୂଜା ମଧ୍ୟ  କଟକଣାରେ ପାଳିତ ହେବ। ପୂଜା ବେଶୀ ଆଡ଼ମ୍ବରପୂର୍ଣ୍ଣ ହେବ ନାହିଁ। କେବଳ ରୀତିନୀତି ପାଇଁ ପୂଜାର୍ଚ୍ଚନା ହେବ।  ବିଏମସି ଗାଇଡଲାଇନ ଅନୁଯାୟୀ ଆବଦ୍ଧ ମଣ୍ଡପରେ ବିନା ଭକ୍ତରେ ମୂର୍ତ୍ତି ପୂଜା କରାଯିବ। ପୂଜା ସମୟରେ ପ୍ରକାରର ଗହଳି ଓ ସାଂସ୍କୃତିକ କାର୍ଯ୍ୟକ୍ରମକୁ ମନା କରାଯାଇଛି ।

ଦୁର୍ଗାଙ୍କ ପରି ଲକ୍ଷ୍ମୀଙ୍କର ମୂର୍ତ୍ତି ମଧ୍ୟ ପୂର୍ବପରି ୪ ଫୁଟ ଉଚ୍ଚତା ବିଶିଷ୍ଟ ହେବ। ପୂଜା ମଣ୍ଡପରେ ଏକା ସାଙ୍ଗରେ ୭ରୁ ଅଧିକ ଲୋକଙ୍କୁ ବାରଣ ହୋଇଛି । ସେହିପରି ପେଣ୍ଡାଲରେ ପୂଜା ପାଇଁ ବିଏମସିର ଅନୁମତି ନେବା ସହ ପୂଜା ପେଣ୍ଡାଲ ଆବଦ୍ଧ ରହିବ।। ପୂଜା ପରେ କୌଣସି ଶୋଭାଯାତ୍ରାକୁ ଅନୁମତି ମିଳିବ ନାହିଁ। କୃତ୍ରିମ ପୋଖରୀରେ ବିସର୍ଜନ ହେବ । ଏହାସହିତ ଯେଉଁମାନେ ବିସର୍ଜନରେ ସାମିଲ ହେବେ, ସେମାନେ କୋଭିଡ୍ ଟିକା ଦୁଇ ଡୋଜ୍ ନେଇଥିବାକୁ ପୂଜା କମିଟି ସୁନିଶ୍ଚିତ କରାଇବେ।