ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ମଣିପୁରରେ ବଦଳିବେ କି ମୁଖ୍ୟମନ୍ତ୍ରୀ? ମଣିପୁରରେ ହେବ କି ପଟ୍ଟ ପରିବର୍ତ୍ତନ? ଏହାରି ମଧ୍ୟରେ ଦିଲ୍ଲୀ ଗସ୍ତରେ ଅଛନ୍ତି ମଣିପୁରର କିଛି ବିଧାୟକ । ଚର୍ଚ୍ଚା ହେଉଛି ଏହି ନେତାମାନେ ଦିଲ୍ଲୀରେ କେନ୍ଦ୍ରୀୟ ନେତୃତ୍ୱଙ୍କୁ ଭେଟିବା ସହିତ ରାଜ୍ୟରେ ମୁଖ୍ୟମନ୍ତ୍ରୀ ବଦଳାଇବା ନେଇ ଦାବି କରିପାରନ୍ତି । ମଣିପୁରରେ ହିଂସାକୁ ନେଇ ଏହି ରାଜ୍ୟରେ ରାଜନୀତି ଜୋର ଧରିଛି । ମୁଖ୍ୟମନ୍ତ୍ରୀ ଏନ୍ ବୀରେନ୍ ସିଂଙ୍କ ଉପରେ ମଧ୍ୟ ଅନେକ ପ୍ରଶ୍ନ ଚିହ୍ନ ରହିଛି । ବିରୋଧୀ ବହୁ ବାର୍ ତାଙ୍କୁ ପଦରୁ ହଟାଇବାକୁ ଦାବି କରି ଆସୁଥିବାବେଳେ, ଏହି ରାଜ୍ୟରେ କ୍ଷମତାର ପଟ୍ଟ ପରିବର୍ତ୍ତନ ହେଇପାରେ ବୋଲି କୁହାଯାଉଛି । ତେବେ ନିଜେ ବୀରେନ୍ ସିଂ ଏହି ଦାବିକୁ ଖାରଜ କରୁଥିବାବେଳେ, ତାଙ୍କର ବିରୋଧୀ ଏପରି କଥା ପ୍ରଘଟ କରୁଛନ୍ତି ବୋଲି ସେ କହିଛନ୍ତି ।
କହିରଖୁ ଯେ, ୩ ମେ’ ୨୦୨୩ରେ ମଣିପୁରରେ ଭୟଙ୍କର ହିଂସା ଦେଖିବାକୁ ମିଳିଥିଲା। ଏହି ହିଂସାରେ ୨ ଶହରୁ ଅଧିକ ଲୋକଙ୍କ ଜୀବନ ଯାଇଥିଲା। ମଣିପୁର ହାଇକୋର୍ଟ ୨୭ ମାର୍ଚ୍ଚ ୨୦୨୩ରେ ମେତେଇ ସମ୍ପ୍ରଦାୟକୁ ଅନୁସୂଚିତ ଜନଜାତି (ଏସଟି) ତାଲିକାରେ ଅନ୍ତର୍ଭୁକ୍ତ କରିବାକୁ ବିଚାର କରିବାକୁ ନିର୍ଦ୍ଦେଶ ଦେଇଥିଲେ। ଏହି ନିର୍ଦ୍ଦେଶ ପରେ ମଣିପୁରରେ ଜାତିଗତ ହିଂସା ଆରମ୍ଭ ହୋଇଥିଲା।
