ନ୍ୟାୟ ଖୋଜୁଛି ପରୀ ପରେ ପିହୁ

ବିଞ୍ଝାରପୁର(ବଡ଼ ଖବର ବ୍ୟୁରୋ): ନୟାଗଡ଼ର କୁନି ଝିଅ ପରୀ ହତ୍ୟାକାଣ୍ଡକୁ ନେଇ ସାରା ରାଜ୍ୟରେ ହଲଚଲ ସୃଷ୍ଟି କରିଛି । ହତ୍ୟାକାରୀ କିଏ ତାର ସୁରାଗ ପାଉନି ପୋଲିସ । ଏହି ଲୋମହର୍ଷଣକାରୀ ଘଟଣା ମାନସପଟରୁ ଲିିଭିନଥିବା ବେଳେ ଆଉ ଏକ ଲୋମଟାଙ୍କୁରା ଘଟଣା ଯାଜପୁର ଜିଲ୍ଲାରୁ ଆସିଛି । ୨ବର୍ଷର କୁନି ଝିଅ ପିହୁ ଗାଁ ଦାଣ୍ଡରେ ଖେଳୁଥିବା ବେଳେ ଗାଏବ ହୋଇଯାଇଛି । ତାକୁ ଉଠାଇ ନିଆଯାଇଥିବା ଅଭିଯୋଗ ହୋଇଛି । ୪ ମାସ ବିତିଗଲାଣି ହେଲେ ପୋଲିସ ତାର ଖବର ପାଉନାହିଁ । ପୋଲିସ କେବଳ ମାମଲା ରୁୁଜୁ କରି ଚୂୂପ ବସିଥିବା ଅଭିଯୋଗ ହୋଇଛି । ବିଞ୍ଝାରପୁର ଥାନା ମଧୁସୂଦନ ଗାଁ ଲକ୍ଷ୍ମଣ ନାୟକ । ତାଙ୍କ ଦୁଇ ବର୍ଷର କୁନି ଝିଅ ଶୁଭଲକ୍ଷ୍ମୀ ନାୟକ ଓରଫ ପିହୁ ଗତ ଅଗଷ୍ଟ ୯ ତାରିଖରେ ଗାଁ ଦାଣ୍ଡରେ ଖେଳୁଥିଲେ । ଆଉ ତାଙ୍କ ପତ୍ନୀ ଘର କାମରେ ବ୍ୟସ୍ତ ଥିଲେ । ଏହି ସମୟରେ ପିହୁ କୁଆଡେ ଗାଏବ ହୋଇଯାଇଥିଲା । ପରିବାର ଲୋକେ ବହୁ ଖୋଜାଖୋଜି କରିଥିଲା ବେତେ ପିହୁର ଖବର ମିଳିନଥିଲା ।

ସ୍ଥାନୀୟ ଲୋକଙ୍କ କହିବା ଅନୁସାରେ ପିହୁ ଗାଁ ଦାଣ୍ଡରେ ଖେଳୁଥିବାବେଳେ ଜଣେ ବ୍ୟକ୍ତି ବାଇକରେ ଆସି ଗାମୁଛାରେ ବାନ୍ଧି ତାଙ୍କୁ ନେଇଯାଇଥିଲେ । ଏ ନେଇ ପରିବାର ଲୋକେ ଥାନାରେ ଅଭିଯୋଗ କରିଛନ୍ତି । ପୋଲିସ ଏକ ମାମଲା ରଜୁ କରି ଚୂପ୍ ବସିଛି । ପୋଲିସ ପିହୁକୁ ଖୋଜୁନଥିବା ଅଭିଯୋଗ ହୋଇଛି । ସେପଟେ ଝିଅର ବାପା ବେଙ୍ଗାଲୁରରୁ ଆସି ସଙ୍ଗରୋଧରେ ଥିବାରୁ ଝିଅକୁ ଖୋଜି ପାଇନଥିଲେ । ପିହୁ ନିଖୋଜ ହେବାର ୫ ମାସ ବିତିଗଲାଣି । ହେଲେ ପୋଲିସ ତାର କୌଣସି ଖବର ପାଉନାହିଁ । ଆଜି ପିହୁ ସମ୍ପର୍କରେ ବୁଝିବାକୁ ଜିଲ୍ଲା ସୁରକ୍ଷା ଶିଶୁ ସୁରକ୍ଷା ଅଧିକାରୀ ମଧୁସୂଦନପୁର ଗାଁରେ ପହଂଚି ପରିବାର ଲୋକଙ୍କ ସହ ଆଲୋଚନା କରିଛନ୍ତି । ଅନ୍ୟପଟେ ପୋଲିସ ଏ ସମ୍ପକୟରେ କିଛି କହିବାକୁ ମନା କରିଦେଇଛନ୍ତି ।