ବିବାହ ଭୋଜି ପାଇଁ ଲାଗୁ ହେଲା ନୂଆ କଟକଣା

ବ୍ରହ୍ମପୁର (ବଡ଼ ଖବର ବ୍ୟୁରୋ): କରୋନାର ଦ୍ୱିତୀୟ ଲହରକୁ ନେଇ ସମସ୍ତେ ଚିନ୍ତିତ। ଧିରେ ଧିରେ ରାଜ୍ୟରେ ବଢିବାରେ ଲାଗିଛି ଏହାର ପ୍ରକୋପ । ଏହାକୁ ଦୃଷ୍ଟିରେ ରଖି ଆଜିଠାରୁ ରାଜ୍ୟର ୧୦ଟି ଜିଲ୍ଲାରେ ନାଇଟ କର୍ଫ୍ୟୁ ଜାରି କରାଯାଇଛି। ପୂର୍ବରୁ କରୋନାର ପ୍ରଥମ ପର୍ଯ୍ୟାୟରେ ଗଞ୍ଜାମ ଜିଲ୍ଲା ହଟସ୍ପଟ ଜିଲ୍ଲା ହୋଇଥିଲା । ବର୍ତ୍ତମାନ ଏହି ଜିଲ୍ଲାରେ ମଧ୍ୟ କରୋନା ସଂକ୍ରମିତଙ୍କ ସଂଖ୍ୟା ଦୁଇ ଅଙ୍କ ଚୁଇଁଲାନି ।

ତେଣୁ ଜିଲ୍ଲା ପ୍ରଶାସନ ନୂଆ ଗାଇଡ ଲାଇନ ଜାରି କରିଛନ୍ତି । ସମସ୍ତଙ୍କୁ ଏହି ନିୟମ ମାନିବାକୁ ବାଧ୍ୟ କରାଯାଇଛି। ତାରା ତାରିଣୀ ଯାତ୍ରା, ଦଣ୍ଡ ଯାତ୍ରା ତାହା ସହ ବିବାହ ଭୋଜି ଓ ସାମାଜିକ କାର୍ଯ୍ୟ ନିମନ୍ତେ ଜିଲ୍ଲାପାଳ ଜାରିକରିଛନ୍ତି ନୂଆ ନିୟମ। ବିବାହରେ ଜମିବନି ଭୋଜିଭାତର ଆସର। ଏଥର ଅତିଥିଙ୍କୁ ଖାଦ୍ୟ ପୁଡ଼ିଆରେ ସନ୍ତୁଷ୍ଟ ହେବାକୁ ପଡ଼ିବ। ଜିଲ୍ଲାପାଳଙ୍କ ନିର୍ଦ୍ଦେଶ ଅନୁସାରେ ବିବାହ ଉତ୍ସବରେ ଯୋଗ ଦେବାକୁ ୧୦୦ ଜଣଙ୍କୁ ଅନୁମତି ଦିଆଯାଇଛି । ତା ସହିତ ଭୋଜି ଉପରେ କଟକଣା ଲଗାଯାଇଛି।

ରିସେପ୍ସନରେ ଭୋଜି ବଦଳରେ ଦିଆଯିବ ଖାଦ୍ୟ ପୁଡ଼ିଆ। ଅତିଥିମାନଙ୍କୁ ଖାଦ୍ୟ ପୁଡ଼ିଆ ବଣ୍ଟାଯିବ । ଗହଳି, ଭିଡ଼ ଏଡ଼ାଇବାକୁ ଏହି ନିଷ୍ପତ୍ତି ନିଆଯାଇଥିବା ଜଣାପଡ଼ିଛି । ଯଦି ଏହାର ଉଲ୍ଲଂଘନ କରାଯାଏ, ତା ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲ୍ଲାପାଳଙ୍କ ନିର୍ଦ୍ଦେଶନାମାରେ କୁହାଯାଇଛି ।