ନୀଳଗିରି(ବଡ଼ ଖବର ବ୍ୟୁରୋ): ନୀଳଗିରିରେ ସଫା ହେବାକୁ ବସିଲାଣି ବିଜେଡି । ସାଧାରଣ ନିର୍ବାଚନ ପରେ ବିଜେଡିର ବହୁ ବଡବଡ ନେତା ଏବେ ବିଜେପି ମୁହାଁ ହେଉଛନ୍ତି । ନୀଳଗିରି ଏନଏସିର କାଉନସିଲର ମାନେ ବିଜେଡିରୁ ଅତିଷ୍ଠ ହୋଇ ଦଳକୁ ବାଏ ବାଏ କରି ଏବେ ବିଜେପିରେ ମିଶିଛନ୍ତି । ତେବେ ନୀଳଗିରି NAC ରେ ବିଜେଡିର ଏକ ପ୍ରକାର ପତନ ହେବାକୁ ଯାଉଥିବା ଦେଖିବାକୁ ମିଳିଛି ।
ନୀଳଗିରି NAC ର ବର୍ତ୍ତମାନର ଚେୟାରମେନ ଅମ୍ବିକା ଦାସଙ୍କ ବିରୋଧରେ ୧୩ ଜଣ କାଉନ୍ସିଲରଙ୍କ ମଧ୍ୟରୁ ୧୧ ଜଣ କାଉନ୍ସିଲର ଅନାସ୍ଥା ପ୍ରସ୍ତାବ ଆଣିଛନ୍ତି । ଗତକାଲି ନୀଳଗିରି ବିଧାୟକ ସନ୍ତୋଷ ଖଟୁଆ, ଜିଲ୍ଲା ସଭାପତି ଉମାକାନ୍ତ ମହାପାତ୍ର, ବାଲେଶ୍ବର ସାଂସଦଙ୍କ ବ୍ୟକ୍ତିଗତ ସହାୟକ ଚନ୍ଦ୍ରବିନ୍ଦୁ ଦାସ ଏବଂ ନୀଳଗିରି ଏନଏସିର ୯ ଜଣ କାଉନସେଲର ଜିଲ୍ଲାପାଳଙ୍କୁ ଭେଟି ଅନାସ୍ଥା ପ୍ରସ୍ତାବ ଦେଇଛନ୍ତି । ଏହି ଅନାସ୍ଥା ପ୍ରସ୍ତାବରେ ୧୧ ଜଣ କାଉନସେଲରଙ୍କ ଦସ୍ତଖତ ରହିଅଛି ।
