କରୋନା କାଳରେ ଜୀବନକୁ ବାଜି ଲଗାଉଛନ୍ତି ନର୍ସ, ଉତ୍ସର୍ଗ ହୋଇଛି ଗୋଟିଏ ଦିନ
ଭୁବନେଶ୍ୱର(ବଡ଼ ଖବର ବ୍ୟୁରୋ): ବିପଦ ହୋଇଛି ମହାମାରୀ । ଜାରି ରହିଥିବା ଦ୍ୱିତୀୟ ଲହରରେ ପ୍ରତିଦିନ ସଂକ୍ରମିତ ହେଉଛନ୍ତି ଲକ୍ଷ ଲକ୍ଷ ଲୋକ । ବହୁ ରୋଗୀ ଘରେ ଚିକିତ୍ସିତ ହେଉଥିବା ବେଳେ ଅଧିକାଂଶ ଗୁରୁତର ହୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି । ସମୟ ଏମିତି ଯେ, ନିଜ ଲୋକମାନେ ବି ସାହା ହୋଇପାରୁନାହାନ୍ତି । ଆଉ ହସ୍ପିଟାଲରେ କାର୍ଯ୍ୟ କରୁଥିବା ନର୍ସମାନେ ହିଁ ରୋଗୀଙ୍କ ସାହାରା ପାଲଟିଛନ୍ତି । ଗୁରୁତର ରୋଗୀଙ୍କୁ ବଞ୍ଚାଇବା ପାଇଁ ଅହରହ ସଂଘର୍ଷ କରୁଛନ୍ତି ସେମାନେ । ରୋଗୀମାନେ ତ ସଂଘର୍ଷ କରୁଛନ୍ତି । କିନ୍ତୁ ନିଜ ଜୀବନକୁ ବାଜିରେ ଲଗାଇ ରୋଗୀଙ୍କ ଜୀବନ ଫେରାଇ ଆଣିବାକୁ ବି ସଂଘର୍ଷ କରୁଛନ୍ତି ନର୍ସ ।
କରୋନାର ଏପରି ସମୟରେ କିଛି ନର୍ସ କୋଭିଡ଼ ୱାର୍ଡରେ କାର୍ଯ୍ୟ କରୁଥିବା କାରଣରୁ ଦୀର୍ଘ ଏକ ବର୍ଷ ହେବ ନିଜ ପରିବାରକୁ ଭେଟି ନଥିବା ଖବର ମଧ୍ୟ ସାମ୍ନାକୁ ଆସିଛି । ସେମାନଙ୍କର ଏହି ତ୍ୟାଗ, ସଂଘର୍ଷ ହିଁ ରୋଗୀଙ୍କୁ ନୂଆ ଜୀବନ ଦେବାରେ ସହାୟକ ହେଉଛି । ପ୍ରତିବର୍ଷ ମେ ୧୨ତାରିଖରେ ଅନ୍ତର୍ଜାତୀୟ ନର୍ସ ଦିବସ ପାଳନ କରାଯାଉଛି । ଆଧୁନିକ ନର୍ସିଂର ପ୍ରତିଷ୍ଠାତା ଫ୍ଲୋରେନ୍ସ ନାଇଟିଙ୍ଗେଲଙ୍କ ଜନ୍ମଦିନକୁ ୧୯୭୪ରୁ ‘ଅନ୍ତର୍ଜାତୀୟ ନର୍ସ ଦିବସ’ ଭାବେ ପାଳନ କରାଯାଉଛି ।
କରୋନା ମୁକାବିଲାରେ ନର୍ସ ମାନେ ସବୁବେଳେ ଆଗରେ ରହିଆସିଥାନ୍ତି । ଗବେଷକ ମାନେ ପ୍ରୟୋଗଶାଳାରେ ଭୂତାଣୁ ସହ ଯୁଦ୍ଧ କରୁଥିବା ବେଳେ ଭୂତାଣୁ ବହନ କରୁଥିବା ଅସଂଖ୍ୟ ରୋଗୀଙ୍କ ସେବାରେ ନର୍ସମାନେ ନିୟୋଜିତ ରହିଛନ୍ତି । ମହାମାରୀ ସମୟରେ ସେମାନଙ୍କ ତ୍ୟାଗ ଅପୂରଣୀୟ । ଏଭଳି ମହାନ ସମ୍ମୁଖ ଯୋଦ୍ଧାଙ୍କୁ ଅନ୍ତର୍ଜାତୀୟ ନର୍ସ ଦିବସର ଶୁଭେଚ୍ଛା ଓ ଶୁଭକାମନା ।