ଗର୍ଜିଲା ଓଡ଼ିଶା ଟ୍ରକ ମାଲିକ ସଂଘ
ଦେବଗଡ଼ (ବଡ଼ ଖବର ବ୍ୟୁରୋ): ଦେବଗଡ଼ ଜିଲ୍ଲା ବାରକୋଟ ବ୍ଲକରେ ଗର୍ଜିଲେ ଓଡିଶା ଟ୍ରକ ମାଲିକ ସଂଘର ସଦସ୍ୟ । ଦେବଗଡ଼ ଜିଲ୍ଲାରେ କୌଣସି ଖଣି ଖାଦାନ ନଥିବାରୁ ଦେବଗଡ଼ ଜିଲ୍ଲାର ସମସ୍ତ ପଞ୍ଜିକୃତ ଟ୍ରକ ଏବଂ ଟିପ୍ପର ଗୁଡିକ ସାଧାରଣତଃ ପଡୋଶୀ ସୁନ୍ଦରଗଡ଼ ଓ କେନ୍ଦୁଝର ଜିଲ୍ଲାରେ ଥିବା ଦୁଇଟି ଖଣି କୋଇଡା ଏବଂ ବଡ଼ବିଲ ଉପରେ ସମ୍ପୂର୍ଣ ଭାବେ ନିର୍ଭର କରିଥାନ୍ତି । କିନ୍ତୁ ଏହି ଦୁଇଟି ଜିଲ୍ଲାର ପାତର ଅନ୍ତର ନୀତି ଯୋଗୁଁ ଦେବଗଡ଼ ଜିଲ୍ଲାର ଗାଡି ତଥା ଅନ୍ୟ ପଡୋଶୀ ଜିଲ୍ଲା ସମ୍ବଲପୁର, ଝାରସୁଗୁଡା, ଅନୁଗୁଳ ଜିଲ୍ଲାକୁ ବୋଝେଇ ଦେଉନଥିବା ଅଭିଯୋଗ ହେଉଛି । ଫଳରେ କରୋନା କାଳରେ ଦେବଗଡ଼ ସମେତ ଅନ୍ୟ ପଡୋଶୀ ଜିଲ୍ଲାର ଟ୍ରକ ମାଲିକ ମାନେ ଘୋର କ୍ଷତି ସହିବା ସହ ଋଣ ପରିଶୋଧ କରିପାରୁନଥିବା ଅଭିଯୋଗ କରିଛନ୍ତି ।
ଋଣକୁ ନେଇ ଅନ୍ୟ ଫାଇନାନ୍ସ କମ୍ପାନୀ ମାନେ ମଧ୍ୟ ଟ୍ରକ ମାଲିକମାନଙ୍କୁ ମାନସିକ ନିର୍ୟାତନା ଦେଉଥିବା ମଧ୍ୟ ଅଭିଯୋଗ ହେଉଛି । ଓଡିଶା ଟ୍ରକ ମାଲିକ ସଂଘର ସଭାପତି ପୁରଞ୍ଜନ ପାଢ଼ୀଙ୍କ କହିବା ଅନୁସାରେ କୋଇଡା ଓ ବଡ଼ବିଲର କିଛି ମୁଷ୍ଟିମେୟ ସଂଗଠନ ନିଜ ଜିଲ୍ଲାକୁ କେବଳ ପ୍ରାଧାନ୍ୟ ଦେଉଛନ୍ତି । ଅନ୍ୟ ଜିଲ୍ଲାକୁ ଗୁରୁତ୍ୱ ଦେଉନଥିବା ଅଭିଯୋଗ ଆଣିଛନ୍ତି । ଆଗାମୀ ଦିନରେ ସରକାର ଯଦି ଏହି ସମସ୍ୟାର ସମାଧାନ ନ କରନ୍ତି ଏହି ଆନ୍ଦୋଳନ କୁ ରାଜ୍ୟବ୍ୟାପୀ କରିବାକୁ ସଂଘର ସଭାପତି ପୁରଞ୍ଜନ ପାଢ଼ୀ କହିଛନ୍ତି ।