ବରଗଡ଼ (ବଡ଼ ଖବର): ରାତି ଅଧରେ ମହିଳା ପୋଲିସ ନନେଇ ସ୍ଥାନୀୟ ଟେଙ୍ଗରୀ ଗ୍ରାମର ଝସକେତନଙ୍କ ଘରେ ପଶି ତାଙ୍କ ସ୍ତ୍ରୀଙ୍କୁ ଖରାପ ଭାଷାରେ ଗାଳି ଗୁଲଜ କରିବା ସହ ଜିନିଷପତ୍ର ଭଙ୍ଗା ରୁଜା କରିବା ଅଭିଯୋଗରେ ରୁଜୁ ହୋଇଛି ମାମଲା । ଏମିତିକି ଝସକେତନଙ୍କ ସ୍ତ୍ରୀଙ୍କୁ ଟଣାଓଟରା କରୁଥିବା ବେଳେ ତାଙ୍କ ମଙ୍ଗଳସୂତ୍ର ଛିଣ୍ଡି ଯାଇଥିବା ମଧ୍ୟ ଅଭିଯୋଗରେ ଦର୍ଶାଯାଇଛି । ଥାନା ଅଧିକାରୀଙ୍କ ସହ ଦୁଇଜଣ କନେଷ୍ଟବଳଙ୍କ ନାଁରେ ହୋଇଛି ମାମଲା । ବରଗଡ ଜିଲ୍ଲା ବିଜେପୁର ଥାନା ଅଧିକାରୀ ସୁନିଲ କୁମାର ଦୋରାଙ୍କ ସହ ଦୁଇଜଣ କନେଷ୍ଟବଳଙ୍କ ନାମରେ ମାମଲା ରୁଜୁ ହୋଇଛି ।
ଶୁକ୍ରବାର ରାତିରେ ଝସକେତନ ତାଙ୍କ ଶ୍ୱଶୁରଙ୍କ ଚିକିତ୍ସା କରାଇ ଘରକୁ ଫେରୁଥିବା ବେଳେ ବାଟରେ ଜଣେ ହାଇୱା ଡ୍ରାଇଭରଙ୍କ ସହ ଝଗଡା ହୋଇଥିଲା । ଘଟଣାଟି ଯାଇ ଥାନାରେ ପହଞ୍ଚିଥିଲା । ଝସକେତନଙ୍କ ନାମରେ ମଧ୍ୟ ମାମଲା ରୁଜୁ ହୋଇଥିଲା । ଗତକାଲି ରାତିରେ ଥାନା ଅଧିକାରୀଙ୍କ ସହ ଦୁଇ କନେଷ୍ଟବଳ ଝସକେତନଙ୍କ ଘରେ ପହଁଞ୍ଚିଥିଲେ । ଝସକେତନ କବାଟ ନଖୋଲିବାରୁ ଥାନା ଅଧିକାର ପ୍ରଥମେ ଢ଼େଲା ପଥର ମାଡ କରିଥିଲେ । ପରେ ସେ କବାଟ ଭାଙ୍ଗି ଘରେ ଧସେଇ ପଶିବା ସହ ଘରର ଜିନିଷପତ୍ର ଭଙ୍ଗାରୁଜା କରିଥିବା ଅଭିଯୋଗ କରିଛନ୍ତି ଝସକେତନଙ୍କ ସ୍ତ୍ରୀ ସୁକାନ୍ତି ।
