ବିଶ୍ୱକୁ ମାହାତ୍ମା ଗାନ୍ଧୀଙ୍କ ବଡ଼ ଅବଦାନ କ’ଣ ଜାଣନ୍ତି ?

ଭୁବନେଶ୍ୱର (ବଡ଼ ଖବର ବ୍ୟୁରୋ): ମାହାତ୍ମା ଗାନ୍ଧୀ । ମୋହନ ଦାସ କରମ ଚାନ୍ଦ ଗାନ୍ଧୀ । ପ୍ରତିଟି ଭାରତୀୟଙ୍କ ଆଦରର ବାପୁ । ଜାତିର ଜନକ ମାହାତ୍ମା ଗାନ୍ଧୀଙ୍କ ଆଜି ତିରୋଧାନ ଦିବସ । ଅହିଂସାର ପୂଜାରୀ ମାହାତ୍ମା ଗାନ୍ଧୀ ପ୍ରାର୍ଥନା ସଭାକୁ ଯିବାବେଳେ ଆତତାୟୀର ଗୁଳିରେ ଟଳି ପଡ଼ିଥିଲେ । ଭାରତ ପାଇଁ ତାଙ୍କର ବଳିଷ୍ଠ ଅବଦାନକୁ ଚିରଦିନ ମନେରଖିବା ପାଇଁ ପାଳନ କରାଯାଉଛି ସହିଦ ଦିବସ ।

୧୮୬୯ ଅକ୍ଟୋବର ୨ ରେ ଗୁଜୁରାଟର ପୋରବନ୍ଦରରେ ଜନ୍ମ ଗ୍ରହଣ କରିଥିଲେ ମୋହନ ଦାସ । ଶ୍ରୀମଦ ଭଗବତ ଗୀତା, ବାଇବେଲ, କୋରାନ ପ୍ରଭୃତି ଧର୍ମ ଗ୍ରନ୍ଥର ମହତ ବାଣୀ ପିଲାବେଳୁ ତାଙ୍କୁ ପ୍ରଭାବିତ କରିଥିଲା । ୧୩ ବର୍ଷ ବୟସରେ ସେ କସ୍ତୁର ବାଙ୍କୁ ବିବାହ କରିଥିଲେ । ଲଣ୍ଡନରେ ଓକିଲାତି ପଢି ୧୮୯୧ରେ ଭାରତ ଫେରି ଆରମ୍ଭ କରିଥିଲେ କର୍ମମୟ ଜୀବନ । କିନ୍ତୁ ୧୮୯୩ ଠାରୁ ମୋହନ ଦାସଙ୍କୁ ଚିହ୍ନିଲା ବିଶ୍ୱ ।

ଚୁକ୍ତିଭିତ୍ତିକ ଆଇନଗତ କାର୍ଯ୍ୟ ପାଇଁ ୧୮୯୩ରେ ମୋହନ ଦାସ ଯାଇଥିଲେ ଦକ୍ଷିଣ ଆଫ୍ରିକା । ସେଠାରେ ବର୍ଣ୍ଣ ବୈଷମ୍ୟ ବିରୋଧରେ ସେ ଆରମ୍ଭ କରିଥିଲେ ଲଢେଇ । ଏହି ଲଢେଇରେ ଦରକାର ପଡ଼ି ନଥିଲା ଅସ୍ତ୍ରଶସ୍ତ୍ର । ଅହିଂସା ମାର୍ଗରେ ଦୀର୍ଘ ୨୧ ବର୍ଷ ଧରି ଚାଲିଥିଲା ତାଙ୍କ ଲଢେଇ । ଯୁଦ୍ଧ ସେ ହିଁ ଜିତିଥିଲେ ।

୧୯୧୫ ମସିହାରେ ମୋହନ ଦାସ କରମ ଚାନ୍ଦ ଗାନ୍ଧୀ ସ୍ୱଦେଶ ଫେରିଥିଲେ । ମାତ୍ର ୧୫ ବର୍ଷ ଭିତରେ ଭାରତୀୟ ଜାତୀୟ ମୁକ୍ତି ଆନ୍ଦୋଳନର ସେ ହିଁ ହୋଇପାରିଥିଲେ କର୍ଣ୍ଣଧାର । ତାଙ୍କ ଅହିଂସା ଆନ୍ଦୋଳନ ‘ସତ୍ୟାଗ୍ରହ’ ଇଂରେଜ ସରକାରର ପଥର ହୃଦୟକୁ ତରଳାଇ ଦେଇଥିଲା । ୧୯୪୭ ଅଗଷ୍ଟ ୧୫ ରେ ବ୍ରିଟିଶ ପତାକା ଅପଶରି ଫରଫର ହୋଇ ଉଡ଼ିଥିଲା ତ୍ରିରଙ୍ଗା ।

ଦୀର୍ଘ ୩୦୦ ବର୍ଷ ପରାଧୀନ ଭାରତ ସ୍ୱାଧୀନ ହେଲା । ଦେଶବାସୀ ସ୍ୱାଧୀନତାର ପ୍ରକୃତ ସ୍ୱାଦ ଚାଖିବା ପୂର୍ବରୁ ଘୋଟି ଆସିଲା କଳା ବାଦଲ । ୧୯୪୮ ଜନୁଆରୀ ୩୦ରେ ନାଥୁରାମ ଗଡ଼ସେଙ୍କ ଗୁଳିରେ ଚିରଦିନ ପାଇଁ ଆଖି ବୁଜିଦେଲେ ମହାପୁରୁଷ ମାହାତ୍ମା ଗାନ୍ଧୀ ।

ସମଗ୍ର ବିଶ୍ୱ ଦେଖିଲା ଅହିଂସାର ପରାକ୍ରମ । ମହାତ୍ମାଙ୍କ ସତ୍ୟାଗ୍ରହର ତାକତ ବନ୍ଧୁକ ଓ କମାଣଠାରୁ ଆହୁରି ଶକ୍ତିଶାଳୀ ।