କାମାକ୍ଷନଗର, (ବଡ଼ ଖବର ବ୍ୟୁରୋ): ଢେଙ୍କାନାଳ ଜିଲ୍ଲା କାମାକ୍ଷାନଗର ମେଡିକାଲରେ ରୋଗୀ ମୃତ୍ୟୁକୁ ନେଇ ଉତ୍ତେଜନା। ଅକ୍ସିଜେନ ଅଭାବରୁ ରୋଗୀଙ୍କ ମୃତ୍ୟୁ ହୋଇଥିବା ପରିବାର ଲୋକେ ଅଭିଯୋଗ କରିଛନ୍ତି। ଡାକ୍ତର ଓ ଷ୍ଟାଫନର୍ସଙ୍କ ଅବହେଳାରୁ ରୋଗୀଙ୍କ ମୃତ୍ୟୁ ହୋଇଥିବା କହିଛନ୍ତି ପରିବାର ଲୋକେ। ସୂଚନା ଅନୁଯାୟୀ, କାମାକ୍ଷାନଗର ଥାନା କାନପୁରା ଗାଁର ସରୋଜ କୁମାର ରାଉତ ଗୁରୁତର ଅବସ୍ଥାରେ ଆଜି କାମାକ୍ଷାନଗର ମେଡିକାଲରେ ଭର୍ତ୍ତି ହୋଇଥିଲେ। ଡାକ୍ତର ସୁନୀଲ କୁମାର ଶୁକ୍ଳା ତାଙ୍କୁ ଅକ୍ସିଜେନ ଦେବା ପାଇଁ କହିଥିଲେ। ମେଡିକାଲର ନର୍ସ ପ୍ରଥମେ ଏକ ଖାଲି ସିଲିଣ୍ଡର ଆଣି ଲଗାଇଥିଲେ। ତେବେ କିଛି ସମୟ ପରେ ସରୋଜ ନିଃଶ୍ୱାସ ପ୍ରଶ୍ଵାସ ନେବାରେ କଷ୍ଟ ଅନୁଭବ କରିଥିଲେ। ତାଙ୍କ ଅବସ୍ଥା ସଙ୍କଟାପନ୍ନ ହୋଇପଡ଼ିଥିଲା। ପରିବାର ଲୋକେ ଏଥିରେ ଅକ୍ସିଜେନ ନାହିଁ ବୋଲି କହିବାରୁ ନର୍ସ ଜଣକ ଅନ୍ୟ ଏକ ଅକ୍ସିଜେନ ସିଲିଣ୍ଡର ଆଣି ଲଗାଇଥିଲେ। ଅକ୍ସିଜେନ ସିଲିଣ୍ଡର ଲାଗାଇବାର କିଛି ସମୟ ପରେ ସରୋଜଙ୍କ ମୃତ୍ୟୁ ହୋଇଥିଲା। ଡାକ୍ତର ଶୁକ୍ଳାଙ୍କ ଅବହେଳା ଯୋଗୁ ସରୋଜଙ୍କ ମୃତ୍ୟୁ ହୋଇଥିବା ଅଭିଯୋଗ କରିଛନ୍ତି ପରିବାର ଲୋକେ। ଏ ନେଇ ମେଡିକାଲରେ କିଛି ସମୟ ଉତ୍ତେଜନା ପ୍ରକାଶ ପାଇଥିଲା। କାମାକ୍ଷାନଗର ପୋଲିସ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିବା ପରେ ପରିସ୍ଥିତି ନିୟନ୍ତ୍ରଣକୁ ଆସିଥିଲା। ଡାକ୍ତରଙ୍କ ଅବହେଳା ଓ ଅକ୍ସିଜେନ ଅଭାବରୁ ରୋଗୀଙ୍କ ମୃତ୍ୟୁ ହୋଇଥିବା ଅଭିଯୋଗକୁ ଏସଡିଏମଓ ରତ୍ନାକର ସାମଲ ଖଣ୍ଡନ କରିଛନ୍ତି। କିପରି ତାଙ୍କର ମୃତ୍ୟୁ ହେଲା ତାହାର ତଦନ୍ତ କରାଯିବ ବୋଲି ସେ କହିଛନ୍ତି।
