ଆଜି ଶ୍ରୀମନ୍ଦିରରେ ପ୍ରଥମାଷ୍ଟମୀ: ବଡ଼ ଠାକୁର ହେଲେ ପୋଢ଼ୁଆଁ

ପୁରୀ(ବଡ଼ ଖବର ବ୍ୟୁରୋ): ଆଜି ଶ୍ରୀମନ୍ଦିରରେ ପ୍ରଥମାଷ୍ଟମୀ ପର୍ବ ପାଳନ କରାଯାଇଛି। ଏଥିପାଇଁ ମନ୍ଦିରରେ ଅନେକ ରୀତିନୀତି ଅନୁଷ୍ଠିତ ହୋଇଛି । ମାର୍ଗଶିର ମାସ କୃଷ୍ଣ ଅଷ୍ଟମୀ ତିଥି ଦିନ ଶ୍ରୀମନ୍ଦିରରେ ଭୋଗ ମଣ୍ଡପ ସରିବା ପରେ ୩ ବାଡରେ ମଇଲମ କରାଯାଇ ପୁଜା ପଣ୍ଡା ସେବକଙ୍କ ଦ୍ୱାରା ମହାସ୍ନାନ ନିତୀ ହୋଇଥାଏ । ଏହାପରେ ପାଳିଆ ଶ୍ରୀବିଗ୍ରହଙ୍କୁ ନୂଆ ଲୁଗା ଲାଗି କରିଥାନ୍ତି । ପୁଜାପଣ୍ଡା , ପତିମହାପାତ୍ର ,ମୁଦିରସ୍ତ, ସେବକ, ଘଟୁଆରୀ ଚନ୍ଦନ ଘର ଠାରୁ ଚନ୍ଦନ ବିଜେ କରାଇ ଆଣି ୩ ବାଡରେ ଲାଗି କରିଥାନ୍ତି । ବେଶ ଓ ଅଳଙ୍କାରରେ ବିମଣ୍ଡିତ ହୋଇ କର୍ପୂର ଲାଗି ପରେ ପୁଷ୍ପାଳକମାନେ ସିଂହାସନରୁ ଓହ୍ଳାଇ ଆସିଥାନ୍ତି। ପରେ ୩ ବାଡରେ ପୁଜାପଣ୍ଡା , ପତି ମହାପାତ୍ର , ମୁଦିରସ୍ତ, ସେବକ ବରୁଣ ପୁଜା କରିଥାନ୍ତି । ଏହାପରେ ପାଣି ପଡି ମଧ୍ୟାହ୍ନ ଧୂପ ଉଠିସାରିବାପରେ ୩ ବାଡରେ ମଙ୍ଗଳାର୍ପଣ ନୀତୀ ହେବା ସହ ପ୍ରସାଦ ଲାଗି ହୋଇ ବନ୍ଦାପନା ହୋଇଥାଏ । ଏହିପରି ଭାବେ ପ୍ରଥମାଷ୍ଟମୀ ଦିନ ଶ୍ରୀମନ୍ଦିରରେ ବିଶେଷ ନୀତି ପାଳିତ ହୋଇଥାଏ।