କରୋନା ଆକ୍ରାନ୍ତଙ୍କ ଆତ୍ମହତ୍ୟା
ରାୟଗଡା (ବଡ଼ ଖବର ବ୍ୟୁରୋ): କରୋନା ଆକ୍ରାନ୍ତ ରେଳ କର୍ମଚାରୀଙ୍କ ଆତ୍ମହତ୍ୟ । ମାନସିକ ଭାରସାମ୍ୟ ହରାଇ ବନ୍ଦ କୋଠରୀରେ ଫ୍ୟାନରେ ଦଉଡି ବାନ୍ଧି ଝୁଲି ସେ ଆତ୍ମହତ୍ୟା କରିଛନ୍ତି । ସୁନ୍ଦରଗଡ ଜିଲ୍ଲାର ଜଣେ ଲୋକ ରାୟଗଡା ରେଳ ଡିଭିଜନରେ କିରାଣି ଭାବେ କାର୍ଯ୍ୟ କରୁଥିଲେ । ସେ ଅସୁସ୍ଥ ଅନୁଭବ କରିବା ପରେ କୋଭିଡ ପରୀକ୍ଷା କରାଇଥିଲେ । ପରେ ସେ କରୋନା ଆକ୍ରାନ୍ତ ହୋଇଥିବା ଜାଣିପାରିଥିଲେ ।
ଏହାକୁ ନେଇ ସ୍ୱାସ୍ଥ୍ୟ ବିଭାଗ ପକ୍ଷରୁ ଗତ ୨ଦିନ ଧରି ଚିକିତ୍ସା ମଧ୍ୟ ଯୋଗାଇ ଦିଆଯାଉଥିଲା । ସବୁଦିନ ଭଳି ରବିବାର ମଧ୍ୟ ତାଙ୍କୁ ସ୍ୱାସ୍ଥ୍ୟ କର୍ମଚାରୀମାନେ ଫୋନଯୋଗେ ଯୋଗାଯୋଗ କରିବାକୁ ଉଦ୍ୟମ କରିଥିଲେ । କିନ୍ତୁ ସମ୍ପୃକ୍ତ ବ୍ୟକ୍ତିଙ୍କ ଠାରୁ କୌଣସି ଉତ୍ତର ମିଳିନଥିଲ । ଫଳରେ ପାଖ ପଡିଶାଙ୍କୁ କହି ସମ୍ପର୍କ କରିବାକୁ ସ୍ୱାସ୍ଥ୍ୟ ବିଭାଗ କର୍ମଚାରୀମାନେ ଉଦ୍ୟମ କରିଥିଲେ ।
ତେବେ ଘରକୁ ଯାଇ ବାରମ୍ବାର ଡାକିଥିଲେ ମଧ୍ୟ କୌଣସି ଉତ୍ତର ନମିଳିବାରୁ ବାଧ୍ୟହୋଇ କବାଟ ଭାଙ୍ଗି ଘରେ ପଶିଥିଲେ ସ୍ୱାସ୍ଥ୍ୟ ବିଭାଗ କର୍ମଚାରୀ । କରୋନା ଆକ୍ରାନ୍ତ ବ୍ୟକ୍ତିଙ୍କୁ ଫ୍ୟାନରେ ଝୁଲନ୍ତା ଅବସ୍ଥାରେ ପାଇଥିଲେ । ଏହାକୁ ନେଇ ରୋଳବାଇ ଥାନାରେ ଅପମୃତ୍ୟୁ ମାମଲା ରୁଜୁ କରାଯାଇଥିବା ଆରପିଏଫ ଇନ୍ସପେକ୍ଟର ତ୍ରିଲୋକନାଥ କହିଛନ୍ତି ।