କାବୁଲ(ବଡ଼ ଖବର ବ୍ୟୁରୋ): ଆଫଗାନିସ୍ଥାନରେ ଦିନକୁ ଦିନ ସ୍ଥିତି ଅସମ୍ଭାଳ ହୋଇ ପଡୁଛି । ଏବେବି ଲୋକେ ଭୟରେ ଦେଶ ଛଡିବା ପାଇଁ ବ୍ୟାକୁଳ ହେଉଛନ୍ତି । ଏପଟେ ଗତ ଗୁରୁବାର କାବୁଲ ଏୟାରପୋର୍ଟ ନିକଟରେ ଆଇଏସ୍-କେ ଆତ୍ମଘାତି ହମଲା କରିଥିଲା । ଏହାପରେ ଶନିବାର ଆମେରିକା ଡ୍ରୋନଷ୍ଟ୍ରାଇକ କରି କଡା ଯବାବ୍ ଦେଇଥିଲା । ଶନିବାର ଓ ରବିବାର ଲଗାତାର ଅମେରିକା ୨ ଦିନ ଧରି ଡ୍ରୋନ ଷ୍ଟ୍ରାଇକ କରିଥିଲା । ଏଥିରେ ଅଫଗାନିସ୍ଥାନର ନୀରିହ ଲୋକଙ୍କ ଜୀବନ ଯାଇଥିବା ସୂଚନା ମିଳିଥିଲା । ଯାହାକୁ ନେଇ ଏବେ ତାଲିବାନ କଡା ବିରୋଧ କରିଛି । ବିଦେଶି ମାଟିରେ ଆମେରିକାର ଏଭଳି କାର୍ଯ୍ୟ ନିନ୍ଦନୀୟ । ଏହା ସମ୍ପୂର୍ଣ୍ଣ ରୂପେ ବେଆଇନ । ଏଥିରେ ସାଧାରଣ ଲୋକଙ୍କ ଜୀବନ ଯାଇଛି । ଆମେ ଏହାକୁ ସମ୍ପୂର୍ଣ୍ଣ ରୂପେ ବିରୋଧ କରୁଛୁ ବୋଲି କହିଛି ତାଲିବାନ । ଆମେରିକା ଡ୍ରୋନ ଷ୍ଟ୍ରାଇକ୍ କରିବା ପୂର୍ବରୁ ଏ ସମ୍ପର୍କରେ କୌଣସି ସୂଚନା ଦେଇନଥିବା ମଧ୍ୟ ଦାବି କରିଛି ତାଲିବାନ ।
ପେଣ୍ଟାଗନ ପକ୍ଷରୁ ଡ୍ରୋନ ଷ୍ଟ୍ରାଇକ ସମ୍ପର୍କରେ କୁହାଯାଇଥିଲା ଯେ ଆଇଏସ୍-କେ ପକ୍ଷରୁ ଗୋଟିଏ ସ୍ଥାନୀୟ ଆତଙ୍କୀ ସଂଗଠନ କାର୍ ଦ୍ୱାରା ଆତ୍ମଘାତୀ ହମଲା କରିବାକୁ କାବୁଲରେ ଯୋଜନା କରିଥିଲା । ଏହା ପଶ୍ଚିମ ଦେଶ ଓ ତାଲିବାନ୍ ପ୍ରତି ବିପଦ ସୃଷ୍ଟି କରୁଥିଲା । ତେଣୁ ଆମେରିକା ପକ୍ଷରୁ କରାଯାଇଥିବା ଡ୍ରୋନ ଷ୍ଟ୍ରାଇକ ସମ୍ଭାବ୍ୟ ଆକ୍ରମଣକୁ ପଣ୍ଡ କରାଯାଇଛି । କାର୍ ସମେତ ବିସ୍ଫୋରକ ନିହତ ହେଇଛନ୍ତି । ତେବେ ଏହି ଡ୍ରୋନ ଷ୍ଟ୍ରାଇକରେ ସାଧାରଣ ଲୋକଙ୍କ ମୃତ୍ୟୁ ଘଟିଥିବା ଅଭିଯୋଗରେ ତଦନ୍ତ ଚାଲିଥିବା ନେଇ ପେଣ୍ଟାଗନ କହିଛି ।
