ଭୁବନେଶ୍ୱର (ବଡ଼ ଖବର ବ୍ୟୁରୋ): ମୁଣ୍ଡଫଟା ଖରାରେ ଡହଳବିକଳ ସାରା ଓଡ଼ିଶା । ଆହୁରି ତତେଇବ ଖରା । ଏପ୍ରିଲରୁ ଜୁନ ପର୍ଯ୍ୟନ୍ତ ଓଡ଼ିଶା, ଛତିଶଗଡ ଓ ଝାଡଖଣ୍ଡରେ ପ୍ରବଳ ଗ୍ରୀଷ୍ମ ପ୍ରବାହ ଜାରି ରହିବ ବୋଲି ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଛି । ଏହି ୩ ରାଜ୍ୟରେ ସାଧାରଣ ଠାରୁ ଅଧିକ ତାପମାତ୍ରା ଅନୁଭୂତ ହେବ ।
ରାଜ୍ୟର ୨୧ ଟି ଜିଲ୍ଲାରେ ପ୍ରବଳରୁ ଅତିପ୍ରବଳ ଖରା ହେବ । ବିଶେଷ କରି ସୁନ୍ଦରଗଡ, ସମ୍ବଲପୁର, ଝାରସୁଗୁଡା, କେନ୍ଦୁଝର, ମୟୂରଭଞ୍ଜ, ଦେଓଗଡ, ବରଗଡ, ଅନୁଗୁଳ, ଢେଙ୍କାନାଳ, ସୋନପୁର, ବୌଦ୍ଧ, କନ୍ଧମାଳ, ନୂଆପଡା, ବଲାଙ୍ଗିର, କଳାହାଣ୍ଡି, ନୟାଗଡ, ଖୋର୍ଦ୍ଧା, କଟକ, ଯାଜପୁର, ଭଦ୍ରକ ଓ ବାଲେଶ୍ୱର ପାଇଁ ଏହି ସର୍ତକ ସୂଚନା ଜାରି କରାଯାଇଛି । ୨୧ ମାର୍ଚ୍ଚ ୨୦୧୬ରେ ଭୁବନେଶ୍ୱରେ ୪୨.୨ ଡିଗ୍ରୀ ତାପମାତ୍ରା ରେକର୍ଡ ହୋଇଥିଲା । କିନ୍ତୁ ଏହାପରେ ୨୦୨୧ ମାର୍ଚ୍ଚ ୩୧ରେ ରାଜଧାନୀରେ ୪୪.୨ ଡିଗ୍ରୀ ତାପମାତ୍ରା ଥିଲା, ଯାହାକି ସର୍ବାଧିକ ତାପମାତ୍ରା ରେକ଼ର୍ଡ କରିଛି । ମାର୍ଚ୍ଚରେ ଭୁବନେଶ୍ବରରେ ଯଦି ତାପମାତ୍ରା ଏତେ ଅଧିକ ରହୁଛି, ତେବେ ଏପ୍ରିଲ ମେ ରେ ତାପମାତ୍ରା କେତେ ରହିବ ଏନେଇ ଲୋକଙ୍କ ମନରେ ଭୟ ସୃଷ୍ଟି ହେଲାଣି । ବସନ୍ତ ସରିନି କିନ୍ତୁ ଆକାଶରୁ ନିଆଁ ଝରୁଛି । ସାଧାରଣ ଲୋକ ଘରୁ ବାହାରକୁ ବାହାରି ପାରୁନାହାନ୍ତି । ଝାଞ୍ଜିପବନ ଅସ୍ତବ୍ୟସ୍ତ କରି ରଖିଲାଣି । କେବଳ ଭୁବନେଶ୍ବର ନୁହେଁ ବାରିପଦା, ଟିଟଲାଗଡ, ଜୟପୁର ମଧ୍ୟ ତାପମାତ୍ରା ବଢିବାରେ ଲାଗିଛି । ଲାଗୁଛି ଯେମିତି ସୂର୍ଯ୍ୟଦେବ ଏଥର କୋପ କରିଛନ୍ତି ।
