ଜୟପୁର (ବଡ଼ ଖବର ବ୍ୟୁରୋ): ଦେଶରେ ଦିନକୁ ଦିନ କାୟା ମେଲାଉଛି କରୋନା । ଟିକାକରଣକୁ ଉଭୟ ସରକାର ଏବଂ ଲୋକେ ଆଶା କରିଥିବା ବେଳେ ରାଜସ୍ଥାନ ରାଜଧାନୀ ଜୟପୁରରୁ ଚୋରି ହେଇଛି କରୋନା ଟିକା । ଟିକାକରଣ ଚାଲିଥିବା ବେଳେ ଭ୍ୟାକସିନ୍ କମ୍ ଥିବା ନେଇ ବିଭିନ୍ନ ରାଜ୍ୟ ଅଭିଯୋଗ କରୁଛନ୍ତି। ସେହିଭଳି ରାଜସ୍ଥାନରେ କରୋନା ସ୍ଥିତି ସଙ୍ଗୀନ ହେବାରେ ଲାଗିଛି।
ଜୟପୁରରେ ଥିବା କାନଓ୍ବାଟିଆ ହସ୍ପିଟାଲରେ ଭ୍ୟାକସିନ୍ ଚୋରି ହୋଇଥିବା ନେଇ ହସ୍ପିଟାଲର ଅଧିକ୍ଷକ ହର୍ଷବର୍ଦ୍ଧନ ଶାସ୍ତ୍ରୀ ନଗର ଥାନରେ ଏତଲା ଦେଇଛନ୍ତି। ହସ୍ପିଟାଲରୁ ୩୨୦ ଡୋଜ୍ (୩୨ ସିସି) ଚୋରି ହୋଇଥିବା ଜଣାପଡ଼ିଛି। ପୋଲିସ୍ ଆଇପିସି ୩୮୦ ରେ ମାମଲା ରୁଜୁ କରିଛି। ୧୨ ଏପ୍ରିଲ୍ରେ ହସ୍ପିଟାଲକୁ କରୋନା ଟିକା ମିଳିଥିଲା। ସେହିଦିନ ସନ୍ଧ୍ୟାରେ ଷ୍ଟକ୍ ଚେକ୍ କରାଯିବା ପରେ ୩୨୦ ଡୋଜ୍ କମ୍ ଥିବା ଜଣାପଡ଼ିଥିଲା। ଏନେଇ ଦୁଇ ଦିନ ହସ୍ପିଟାଲ କମିଟି ମାମଲାର ଯାଞ୍ଚ କରିବା ପରେ ଥାନାରେ ଏତଲା ଦିଆଯାଇଛି। ଅନ୍ୟପଟେ କରୋନର ଦ୍ବିତୀୟ ଲହର ରାଜ୍ୟରେ ତାଣ୍ଡବ ରଚିଥିବା ବେଳେ ମୃତକଙ୍କ ସଂଖ୍ୟାରେ ବୃଦ୍ଧି ଘଟୁଛି।
