କୋଭିଡ କୋଭାକ୍ସିନର ଦ୍ୱିତୀୟ ଡୋଜ ନେଲେ ପ୍ରଧାନମନ୍ତ୍ରୀ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଦିନକୁ ଦିନ କରୋନା ସଂକ୍ରମିତଙ୍କ ସଂଖ୍ୟା ବଢବାରେ ଲାଗିଛି । ତା ମଧ୍ୟରେ ଗୁରୁବାର କୋଭିଡ କୋଭାକ୍ସିନର ଦ୍ୱିତୀୟ ଡୋଜ ନେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଦିଲ୍ଲୀ ଏମ୍ସରେ କୋଭାକ୍ସିନ ନେବା ସହ ଲୋକଙ୍କୁ ଭ୍ୟାକ୍ସିନ ନେବା ପାଇଁ ପ୍ରଧାନମନ୍ତ୍ରୀ ଅନୁରୋଧ କରିଛନ୍ତି । ଭୂତାଣୁକୁ ହରାଇବା ଲାଗି ଟିକାକରଣ ଏକ ମାତ୍ର ଉପାୟ । ମୋଦୀ କରୋନା ଟିକାର ଦ୍ୱିତୀୟ ଡୋଜ ପୁଡୁଚେରୀର ନର୍ସ ପି ନିବେଦା ଦେଇଥିବା ବେଳେ ତାଙ୍କ ସହିତ ପଞ୍ଜାବର ନର୍ସ ନିଶା ଶର୍ମା ଉପସ୍ଥିତ ଥିଲେ ।
ପ୍ରଧାନମନ୍ତ୍ରୀ ମୋଦୀ କରୋନା ଟିକାର ପ୍ରଥମ ଡୋଜ ମାର୍ଚ୍ଚ ୧ରେ ନେଇଥିଲେ । ସେତେବେଳେ ବି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଚାନକ ଦିଲ୍ଲୀସ୍ଥିତ ଏମ୍ସରେ ପହଞ୍ଚି ଭାରତ ବାୟୋଟେକର କୋଭାକ୍ସିନ ଟିକା ନେଇଥିଲେ । ଦିଲ୍ଲୀ ଏମ୍ସରେ କାର୍ୟ୍ୟରତ ପୁଡୁଚେରୀର ନର୍ସ ପି,ନିବେଦା ମୋଦୀଙ୍କୁ କୋଭିଡ ଟିକାର ପ୍ରଥମ ଡୋଜ ଦେଇଥିଲେ ।