କ୍ଷମା ମାଗିଲା ଆମେରିକା, କାବୁଲ ଡ୍ରୋନ ଷ୍ଟ୍ରାଇକ ଭୁଲ ଥିଲା

ନୂଆଦିଲ୍ଲୀ(ବଡ଼ ଖବର ବ୍ୟୁରୋ):କାବୁଲ ଏୟାରପୋର୍ଟରେ ହୋଇଥିବା ଡ୍ରୋନ ଷ୍ଟ୍ରାଇକ ଭୁଲରେ ହୋଇଥିଲା । ମୃତ ବ୍ୟକ୍ତିଙ୍କର ଆଇଏସଆଇଏସ-କେ ସହ କୌଣସି ସମ୍ପର୍କ ନାହିଁ । ଏମିତି ଏକ ବୟାନ ଦେଇ ଭୁଲ ଡ୍ରୋନ ଆକ୍ରମଣ ପାଇଁ କ୍ଷମା ମାଗିଛି ଆମେରିକା । ଗତ ମାସରେ କାବୁଲରେ ଆମେରିକା ତରଫରୁ ଆଇଏସଆଇଏସ ଆତଙ୍କବାଦୀଙ୍କ ବିରୋଧରେ ହୋଇଥିଲା ଡ୍ରୋନ ଷ୍ଟ୍ରାଇକ । ଏଥିରେ ଶିଶୁଙ୍କ ସମେତ ମୋଟ ୧୦ଜଣ ସାଧାରଣ ନାଗରିକଙ୍କ ମୃତ୍ୟୁ ହୋଇଥିଲା । ଏକ ସନ୍ଦିଗ୍ଧ ଆଇଏସଆଇଏସ ଅପରେସନକୁ ଟାର୍ଗେଟ କରିବା ପାଇଁ କାବୁଲ ବିମାନବନ୍ଦର ଉପର ଆକ୍ରମଣ କରିଥିଲା ଆମେରିକା ।

ଏନେଇ ଏବେ କ୍ଷମା ମାଗିଛନ୍ତି ଆମେରିକାର ସେଣ୍ଟ୍ରାଲ କମାଣ୍ଡର ଜେନେରାଲ କେନେଥ ମ୍ୟାକେଞ୍ଜି । ଏକ ଅନୁସନ୍ଧାନ ପରେ ସେ କହିଛନ୍ତି ଯେ, ଏହି ଆକ୍ରମଣ ଏକ ଭୁଲ ଥିଲା । ଏଥିରେ ପ୍ରାଣ ହରାଇଥିବା ସାଧାରଣ ଲୋକଙ୍କ ପରିବାରକୁ ଆମେ କ୍ଷମା ପ୍ରାର୍ଥନା ମାଗୁଛୁ । ଏହି ଭୁଲରୁ ଆମେ ବହୁତ ବଡ଼ ଶିକ୍ଷା ମଧ୍ୟ ପାଇଛୁ । ତେବେ ମୃତକଙ୍କ ପରିବାରକୁ କ୍ଷତିପୂରଣ ଦେବାକୁ ସରକାର ଯୋଜନା କରୁଛନ୍ତି ।