ଭୁବନେଶ୍ୱର (ବଡ଼ ଖବର ବ୍ୟୁରୋ): ୪ ଲୁଟେରା, ୧୬ ଚୋରା ବାଇକ, ୪୦ ବାଇକର ପାର୍ଟ୍ସ ଧରିଛି ପୋଲିସ । ବାଇକ ଚୋରି ବିରୋଧରେ କମିସନରେଟ ପୋଲିସ ହାତରେ ଲାଗିଛି ବଡ଼ ସଫଳତା । ବାଇକ୍ ଚୋରି ଗ୍ୟାଙ୍ଗକୁ ଠାବ କରିବାରେ ସଫଳ ହୋଇଛି ପୋଲିସ । ବାଇକ ଚୋରି ଗ୍ୟାଙ୍ଗର ରହିଛି ବାହାର ରାଜ୍ୟର ଲିଙ୍କ୍ । ମୁଖ୍ୟ ଅଭିଯୁକ୍ତ ଭୁବନେଶ୍ୱର ସାମନ୍ତରାୟପୁରର ସୁକାନ୍ତ କୁମାର ରେଡ୍ଡୀ ସହ ପଶ୍ଚିମବଙ୍ଗ ମେଦିନୀପୁରର ୩ ଚୋର ମଧ୍ୟ ଧରାପଡ଼ିଛନ୍ତି । କ୍ୟାପିଟାଲ ଥାନା ପୋଲିସ ଦୀର୍ଘଦିନ ଧରି ଏହି ଗ୍ୟାଙ୍ଗକୁ ଧରିବାକୁ ଜାଲ ବିଛାଇଥିଲା ।
ବିଭିନ୍ନ ସ୍ତରରୁ ଖବର ସଂଗ୍ରହ ପରେ ଏମାନଙ୍କ ଉପରେ ଚଢାଉ ହୋଇଥିଲା । ୪ ଚୋରଙ୍କ ସମେତ ୧୬ ଭଲ କଣ୍ଡିସନରେ ଥିବା ବାଇକ ଜବତ ହୋଇଛି । ଏହାସହ ୪୦ରୁ ଅଧିକ ବାଇକର ଯନ୍ତ୍ରାଂଶ ମଧ୍ୟ ଧରାପଡ଼ିଛି । ଏହି ଗ୍ୟାଙ୍ଗ ଦୀର୍ଘଦିନ ହେବ ରାଜଧାନୀ ଓ ଆଖପାଖ ଅଞ୍ଚଳରେ ବାଇକ ଚୋରିରେ ସଂପୃକ୍ତ ଥିବା ଅଭିଯୋଗ ହୋଇଛି । ବିଭିନ୍ନ ଥାନାରେ ହୋଇଥିବା ଅଭିଯୋଗ ଆଧାରରେ ଏହାର ତଦନ୍ତ କରାଯାଉଥିଲା । ଜବତ ବାଇକ ସେମାନଙ୍କ ପ୍ରକୃତ ମାଲିକଙ୍କୁ ଫେରାଇବା ପାଇଁ ପୋଲିସ ଉଦ୍ୟମ ଆରମ୍ଭ କରିଛି ।
