ମରୁଡ଼ି ଘୋଷଣା ଦାବିରେ ଜିଲ୍ଲାପାଳ ଅଫିସ ଘେରିଲା ବିଜେପି

ନୂଆପଡା (ବଡ଼ ଖବର ବ୍ୟୁରୋ): ନୂଆପଡା ଜିଲ୍ଲାକୁ ସମ୍ପୂର୍ଣ୍ଣ ମରୁଡ଼ି ଘୋଷଣା ଦାବିରେ ଜିଲ୍ଲାପାଳ ଅଫିସ ଘେରିଲା ବିଜେପି । ଚଳିତ ବର୍ଷ ଖରିଫ ଋତୁରେ  ନୂଆପଡ଼ା ଜିଲାରେ ସ୍ବଭାବିକ ଠାରୁ ବହୁତ କମ ବର୍ଷା ହୋଇଛି । ସ୍ଵଳ୍ପ ବୃଷ୍ଟିପାତ ଯୋଗୁଁ ଜିଲ୍ଲାରେ ଗଜା ମରୁଡି ପରିସ୍ଥିତି ଦେଖା ଦେଇଛି । ବର୍ଷା ଅଭାବରୁ ଜମି ଫାଟି ଆଁ କରିଥିବାବେଳେ ଅନେକ ଅଂଚଳରେ ରୁଆ ଓ ବେଉଷଣ ପୂର୍ବରୁ ଚାଷ ନଷ୍ଟ ହୋଇ ସାରିଛି ।

ହେଲେ ଆସନ୍ନ ଗଜା ମରୁଡି ତାଲିକାରେ ନୂଆପଡା ଜିଲାର ନାଁ ରହିନି । ଏବେ ମରୁଡି ଘୋଷଣା ହେଲେ ଜିଲାର ଚାଷୀ ମରୁଡି ସହାୟତାରୁ ବଂଚିତ ହେବା ଆଶଙ୍କା କରିଛନ୍ତି । ଏହାର ପ୍ରତିବାଦରେ ଭାରତୀୟ ଜନତା ପାର୍ଟି କିଷାନ ମୋର୍ଚ୍ଚା ତରଫରୁ ଜିଲ୍ଲାପାଳ ଅଫିସ ଘେରାଉ କରି ବିକ୍ଷୋଭ ପ୍ରଦର୍ଶନ କରିଥିଲେ । ଏଥିରେ ଶତାଧିକ ଚାଷୀ ଯୋଗ ଦେଇଥିଲେ ।

ରାଜ୍ୟ ସରକାରଙ୍କ ଚାଷୀ ମାରଣା ନୀତିକୁ ବିରୋଧ କରି କଡା ସମାଲୋଚନା କରିଥିଲେ । ବିଜେପି କିଷାନ ମୋର୍ଚ୍ଚା ରାଜ୍ୟ ସଭାପତି ପ୍ରଦୀପ ପୁରୋହିତ ଓ ଲୋଇସିଂଙ୍ଗା ବିଧାୟକ ମୁକେଶ ମହାଳିଙ୍କ ଉପସ୍ଥିତିରେ ନୂଆପଡା ଜିଲ୍ଲାପାଳ କାର୍ଯ୍ୟାଳୟ ଘେରାଉ କରି ଏକ ଦାବିପତ୍ର ପ୍ରଦାନ କରିଥିଲେ ।