ଦୁବାଇରେ ଫସିଛନ୍ତି ୧୬ ଓଡ଼ିଆ ଶ୍ରମିକ

ଖଲିକୋଟ (ବଡ଼ ଖବର ବ୍ୟୁରୋ):ଦୁବାଇରେ ଫସିଛନ୍ତି ଗଞ୍ଜାମର ୧୬ଓଡ଼ିଆ ଶ୍ରମିକ । ପାରିଶ୍ରମକି ମାଗିଲେ ମିଳୁଛି ନିର୍ୟାତନା । ଗଞ୍ଜାମ ଜିଲା ଖଲ୍ଲିକୋଟ ବ୍ଲକର ତେନ୍ତୁଳିଆ, କୈଠଡା, ବାକୁଟୁଗାଁ, ଲଙ୍ଗଳେଶ୍ଵର ଓ ଗଞ୍ଜାମ ବ୍ଲକ ପାଲୁରୁ ଗ୍ରାମର ୨୦ ଜଣ ବ୍ୟକ୍ତି ୧୦ ମାସ ତଳେ ଶ୍ରମିକ ଭାବେ କାମ କରିବା ପାଇଁ ଦୁବାଇ ଯାଇଥିଲେ । ଲଙ୍ଗଳେଶ୍ବର ଓ ବାକୁଟୁ ଗାଁର ଦୁଇ ଜଣ ଠିକାଦାର ଜଣଙ୍କ ପିଛା ଏକ ଲକ୍ଷ ଦଶ ହଜାର ଟଙ୍କା ନେଇ ସେମାନଙ୍କୁ ଟୁରିଷ୍ଟ ଭିସାରେ ଦୁବାଇ ପଠାଇ ଥିବା ଅଭିଯୋଗ ହୋଇଛି । ତେବେ ସେଠାରେ କାମ କରିବା ପରେ କମ୍ପାନୀ ଠିକ ଭାବେ ସେମାନଙ୍କୁ ପାରିଶ୍ରମିକ ଦେଉନାହିଁ ।

୩ /୪ ମାସରେ ଗୋଟିଏ ମାସର ଦରମା ଦିଆଯାଉଥିବା ବେଳେ ଖାଇବା ଅତ୍ୟନ୍ତ ନିମ୍ନମାନର ବୋଲି ଶ୍ରମିକମାନେ ଅଭିଯୋଗ କରିଛନ୍ତି । ପାରିଶ୍ରମିକ ଟଙ୍କା ମାଗିଲେ କମ୍ପାନୀ କର୍ତ୍ତୃପକ୍ଷ ସେମାନଙ୍କୁ ନିର୍ୟାତନା ଦେଉଛନ୍ତି। ବର୍ତମାନ ସେଠାରୁ ୪ଜଣ ଫେରି ଆସିଥିବା ବେଳେ ଆଉ ୧୬ଜଣ ଫସି ରହିଛନ୍ତି । ଫସିଥିବା ଓଡ଼ିଆ ଶ୍ରମିକ ମାନେ ଗ୍ରାମକୁ ଫେରିବାକୁ ଚାହିଁଲେ ମଧ୍ୟ କମ୍ପାନୀ ଛାଡୁନାହିଁ । ତେବେ ଶ୍ରମିକ ମାନଙ୍କୁ ଫେରାଇ ଆଣିବା ପାଇଁ ପରିବାର ଲୋକେ ଭେଜିପୁଟ ଫାଣ୍ଡିରେ ଏତଲା ଦେଇଛନ୍ତି ।