ପ୍ରକୃତିକୁ ଫେରିଲେ ୨୦ ନାଗଛୁଆ

ପୁରୀ(ବଡ଼ ଖବର ବ୍ୟୁରୋ): ପ୍ରକୃତିକୁ ଫେରିଲେ ୨୦ ନାଗଛୁଆ । ପୁରୀ ଜିଲ୍ଲା ଡେଲାଙ୍ଗ ବ୍ଲକ ତ ପିଢ଼ପାଟଣା ଗ୍ରାମର ପ୍ରକାଶ ପରିଡାଙ୍କ ଘରକାମ ପାଇଁ ନିଅଁ ଖୋଳିବା ବେଳେ ଏକ ସ୍ଲାବ ତଳେ କିଛି ନାଗସାପ ପଶିଥିବା ଦେଖି ଶ୍ରମିକମାନେ କାମ ବନ୍ଦ କରିଦେଇଥିଲେ । ପ୍ରକାଶ ସ୍ନେକ ହେଲ୍ପ ଲାଇନକୁ ଖବର ଦେଇଥିଲେ । ସ୍ନେକ ହେଲ୍ପ ଲାଇନ ସଦସ୍ୟ ସୁଶାନ୍ତ କୁମାର ବେହେରା ଘଟଣାସ୍ଥଳରେ ପହଞ୍ଚି ଏକ ସିମେଣ୍ଟ ସ୍ଲାବ ତଳେ ଏକ ନାଗସାପ ଏବଂ କିଛି ଅଣ୍ଡା ପାଇଥିଲେ । ସାପ ଟିକୁ ଉଦ୍ଧାର କରି ବ୍ୟାଗରେ ଭର୍ତ୍ତି କରିବା ପରେ ଅଣ୍ଡା ଗୁଡିକୁ ଏକ କାର୍ଟୁନରେ ରଖିଥିଲେ ।

ଶ୍ରମିକମାନଙ୍କ ଅନୁରୋଧ କ୍ରମେ ସେହି ସ୍ଥାନରେ ଅଧିକ ଖୋଜା ଖୋଜି କରିବା ପରେ ଆଉ ୨ ଟି ନାଗ ସାପ ଉଦ୍ଧାର ହୋଇଥିଲା । ପରେ ସାପଗୁଡିକୁ ଗାଁ ଠାରୁ ଦୂରରେ ଛାଡ଼ି ଦିଆଯାଇଥିଲା । ସ୍ନେକ ହେଲ୍ପ ଲାଇନ ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକ ୨୧ ଅଣ୍ଡାକୁ କୃତ୍ରିମ ଉପାୟରେ ଫୁଟେଇବା ବ୍ୟବସ୍ଥା କରିଥିଲେ । ୨୩ ରୁ ୨୬ ଦିନ ଭିତରେ ଦୁଇଟି ପର୍ୟ୍ୟାୟରେ ୨୧ ରୁ ୨୦ ଟି ଅଣ୍ଡା ଫୁଟିଥିଲା । ଜୁନ ୧୬ ତାରିଖରେ ୨୦ ଟି ନାଗ ଛୁଆଙ୍କୁ ଚନ୍ଦକା ବନଖଣ୍ଡ କର୍ମଚାରୀଙ୍କ ଉପସ୍ଥିତିରେ ଛାଡି ଦିଆଯାଇଥିଲା ।