ନେପାଳରୁ ଅଯୋଧ୍ୟା ଆସିବେ ୨୧୦୦୦ ପୂଜାରୀ
କାଠମାଣ୍ଡୁ (ବଡ଼ ଖବର ବ୍ୟୁରୋ): ରାମଲାଲାଙ୍କ ପ୍ରାଣପ୍ରତିଷ୍ଠା ଉପଲକ୍ଷେ ରାମଭକ୍ତିରେ ଗଦଗଦ ସାରା ଭାରତ । ରାମ ମନ୍ଦିର ନିର୍ମାଣରେ ବିଭିନ୍ନ ରାଜ୍ୟର ଯୋଗଦାନ ରହିଥିବା ବେଳେ, ଏବେ ମଧ୍ୟ ଦେଶର ବିଭିନ୍ନ ପ୍ରାନ୍ତରୁ ଛୁଟିଛି ପ୍ରଭୁଙ୍କ ପାଇଁ ବିଭିନ୍ନ ଦିବ୍ୟ ନୈବେଦ୍ୟ । ରାମଲାଲାଙ୍କ ପ୍ରାଣପ୍ରତିଷ୍ଠା ଦିନ ‘ଜୟ ଶ୍ରୀରାମ ନାମ ମହାଯଜ୍ଞ’ ର ଆୟୋଜନ କରାଯାଉଛି । ନେପାଳରୁ ୨୧୦୦୦ ପୁରୋହିତ ଅଯୋଧ୍ୟାକୁ ଆସିବାକୁ ଯାଉଛନ୍ତି।
ରାମ ମନ୍ଦିରର ସମର୍ପଣ ସମାରୋହ ପୂର୍ବରୁ ଜାନୁଆରୀ ୧୪ରୁ ୨୫ ପର୍ଯ୍ୟନ୍ତ ଅଯୋଧ୍ୟାରେ ସରଜୁ ନଦୀକୂଳରେ ୧୦୦୮ ନର୍ମଦେଶ୍ୱର ଶିବଲିଙ୍ଗ ସ୍ଥାପନ ପାଇଁ ଏକ ବିଶାଳ ‘ରାମ ନାମ ମହାଯଜ୍ଞ’ ଆୟୋଜନ କରାଯିବ। ଯେଉଁଥିରେ ଏହି ୨୧ ହଜାର ପୁରୋହିତ ଅଂଶଗ୍ରହଣ କରିବେ। କୁହାଯାଉଛି, ନେପାଳର କେବଳ ୨୧,୦୦୦ ପୁରୋହିତ ଏହି ମହାଯଜ୍ଞ କରିବେ। ଏଥିପାଇଁ ୧୦୦୮ ଟି କୁଡ଼ିଆ ପ୍ରସ୍ତୁତ ହୋଇସାରିଛି।
ଯେଉଁଥିରେ ଏକ ବଡ଼ ଯଜ୍ଞ ମଣ୍ଡପ ମଧ୍ୟ ଅନ୍ତର୍ଭୁକ୍ତ ଏବଂ ଏଥିରେ ୧୧ଟି ଲେୟାରର ଛାତ ଅଛି। ରାମ ମନ୍ଦିରଠାରୁ ୨ କିଲୋମିଟର ଦୂରରେ ଥିବା ସରଜୁ ନଦୀର ବାଲୁକା ଘାଟରେ ୧୦୦ଏକର ଜମିରେ ଏକ ଟେଣ୍ଟ ପ୍ରତିଷ୍ଠା କରାଯାଇଛି। ପ୍ରତିଦିନ ୫୦,୦୦୦ ଭକ୍ତଙ୍କ ରହିବା ପାଇଁ ବ୍ୟବସ୍ଥା କରାଯାଉଛି । ପ୍ରତିଦିନ ପ୍ରାୟ ୧ ଲକ୍ଷ ଭକ୍ତଙ୍କ ପାଇଁ ଭୋଜି ଆୟୋଜନ କରାଯିବ। ମହାଯଜ୍ଞ ସମାପ୍ତ ହେବା ପରେ ୧୦୦୮ ଶିବଲିଙ୍ଗ ପବିତ୍ର ସରଜୁ ନଦୀରେ ବିସର୍ଜନ କରାଯିବ।